काठमाडौं । नेकपा एमालेका वरिष्ठ नेता तथा पूर्वप्रधानमन्त्री झलनाथ खनालको मिर्गौला प्रत्यारोपण गरिएको छ । बुधबार भारतको नयाँ दिल्लीस्थित अपोलो अस्पतालमा खनालको मिर्गौला प्रत्यारोपण गरिएको छ ।

खनालको मिर्गौला प्रत्यारोपण सफलतापूर्वक सम्पन्न भएको उनका स्वकीय सचिव कृष्ण भट्टराईले जानकारी गराएका छन् । भट्टराईले सामाजिक सञ्जाल मार्फत खनालको स्वास्थ्य अवस्था सम्बन्धि जानकारी दिएका हुन् ।

उनले लेखेका छन्, “केही समययता भारतको ओपोलो अस्पतालमा मिर्गौला रोग विशेषज्ञ डा. अखिल मिश्रको नेतृत्वमा नेपाल कम्युनिस्ट पार्टी (एमाले)का वरिष्ठ नेता तथा पूर्वप्रधानमन्त्री झलनाथ खनालज्यूको उपचार भइरहेको थियो । आज सर्जन सन्दीप गुलेरियाको नेतृत्वमा रहेको टिमले पूर्वप्रधानमन्त्रीज्यूको मिर्गौला प्रत्यारोपण सफलतापूर्वक सम्पन्न गरेको छ ।”

भट्टराईका अनुसार खनाल केही समय अस्पतालमै आराम गरेपछि स्वदेश फर्कने छन् ।