कञ्चनपुर । नेपाली कांग्रेसका केन्द्रीय सदस्य एनपी साउदले कम्युनिस्टहरुले सत्ताबाट बाहिरिसकेपछि लालपूर्जा बाँड्नै भ्रम फैलाइरहेको बताएका छन् । कञ्चनपुरको झलारीमा आयोजित कार्यकर्ता भेलालाई सम्बोधन गर्दै नेता साँउदले कम्युनिस्टहरुले बिक्री मूल्यभन्दा पनि महँगोमा जग्गा वितरण गर्ने र पार्टीलाई पोस्ने योजना बनाएको टिप्पणी गरेका हुन् ।

उनले भने, ‘कम्युनिस्टहरुले सत्तामा हुँदा साढे तीन वर्षसम्म केही पनि गरेनन् । तर, सत्तामा टिक्नै नसक्ने अवस्था भएपछि लालपूर्जा बाँड्नै हल्ला गरे र आयोग गठन गरे । विगतमा हामीले बनाएका आयोग पनि कम्युनिस्ट आएपछि खारेज गरेकै हुन् । आज हामीले पनि उक्त आयोग खारेज गर्ने निर्णय गरेका छौं । फरक यत्ति हो कि कम्युनिस्टहरुले ५० औं वर्षदेखि भोगचलन गरेको जग्गालाई बिक्री मूल्यभन्दा पनि महँगोमा नापजाँच गर्ने र पार्टी पोस्ने रणनीति बनाएका थिए ।’

कांग्रेस नेतृत्वको सरकारले उक्त रणनीतिलाई असफल पार्दै जग्गाको सही मूल्यांकन गरेर सस्तोमा जग्गा उपलब्ध गराउने नेता साउदले बताए । उनले भने, ‘जनताको जग्गा जनतालाई बाँडेर पार्टीलाई पोस्ने काम असफल भएपछि केहीले विरोध गरिरहेका छन् । कांग्रेस नेतृत्वको सरकारले अब चाँडै सुकुम्बासी आयोग बनाएर सस्तोमा जग्गा वितरण गर्नेछन ।’

आरक्षको समस्या आफूले नै सुशील कोइराला नेतृत्वको सरकारमा मन्त्री हुँदा समाधानको तहमा काम गरेको र केहीलाई पैसासमेत वितरण गरेर टुग्याइएको बताए । उनले भने, ‘यो समस्या धेरै हदसम्म समाधानको तहमा पुगाएका थियौं । तर, केहीलाई जग्गा खोजेर उपलब्ध गराउने र पैसा वितरणको गराउन बाँकी रहँदा सरकार परिवर्तन भयो र त्यो काम कम्युनिस्ट सरकारले अलपत्र पार्यो । साढे तीन वर्षसम्म एकजना आरक्ष पीडितलाई पनि जग्गा उपलब्ध गराउन नसकेको कम्युनिस्ट सरकारले अहिले सत्ताबाट बाहिरिएपछि भ्रम फैलाइरहेको छ ।’

उनले थपे, ‘साढे तीन वर्षसम्म कुनै आरक्षपीडितले जग्गा पायो रु अनि अहिले जग्गा दिने भनेर हल्ला गरिरहेका छन् । एक पुर्जा नदिने अनि कुरा ठूलो गर्ने रु यस कुरालाई कांग्रेस साथीहरुले नागरिक तहमा बुझाउन आवश्यक छ । यो समस्या समाधान गर्न कांग्रेस तयार छ । समस्या समाधान गछौं, गराउँछौं ।’

उनले सुकुम्बासी आयोग गठन गर्ने कुरामा ढिलाइ नगरिनेसमेत प्रतिबद्धता व्यक्त गरेका छन् ।