काठमाडौँ । सरकारले देवी ज्ञवाली नेतृत्वको भूमिसम्बन्धी समस्या समाधान आयोग खारेज गरेसँगै नेकपा एमाले सम्वद्ध राष्ट्रिय युवा संघले बिहीबार प्रदर्शन गर्यो । प्रदर्शनलाई समेट्दै मेरो न्यूज डटकमले भूमि आयोग खारेजविरुद्ध युवा संघको विरोध प्रदर्शन (फोटोफिचर) शीर्षकमा तस्वीरहरू सार्वजनिक गरेको थियो ।

सोही तस्वीरहरूमा समावेश भएकामध्ये एक युवा सामाजिक सञ्जालमा चर्चित बन्न पुगे । उनी थिए, वीरबहादुर श्रेष्ठ (सुमन) ।

मनोहरा सुकुम्बासी बस्तीबाट मूल सडकसम्म निकालिएको प्रदर्शनको फोटोमा श्रेष्ठप्रति सबैको ध्यान जानुको कारण थियो– उनले लगाएको सुन । सोही आधारमा उनीमाथि सामाजिक सञ्जालमा अनेक टिप्पणी भए ।

यस विषयमा मेरो न्यूजले फोन गर्दा श्रेष्ठले भने, ‘पोजेटिभ सोच राख्नु पर्यो, त्यसो हो भने– दलित, सुकुम्बासी, पीडितको पक्षमा अरूले समर्थन गर्न नपाउने हो ?’

उनी सुकुम्बासी भने होइनन् । भूमिसम्बन्धी समस्या आयोगको खारेज र सुकुम्बासीको पक्षमा युवा संघले राखेको प्रदर्शनमा सहभागी जनाएको उनले बताए । ‘म सुकुम्बासीको समर्थनका लागि गएको हुँ, यो राम्रो कुरा हो, सही सन्देशका साथ जानु पर्नेमा गलत तरिकाले गएको छ,’ उनले भने ।

‘यहाँ वास्तविक सुकुम्बासीकै ५ तले घर छ, कोही सुकुम्बासीले राम्रोसँग खानसमेत पाएका छैनन्, म पीडितको पक्षमा निस्वार्थ समर्थन गर्न गएको हुँ,’ उनले भने, ‘मलाई ५/१० तोला सुन लगाउन कुनै गाह्रो हैन, गाडी चढ्छु–काम गर्छु, त्यो मेरो व्यक्तिगत कुरा हो, मैले म सुकुम्बासी भनेको थिइनँ, तर अनेक टिप्पणी गरे ।’

उनले नेवारहरूको गुठी विधेयक आन्दोलनमा सबैले जाति तथा धर्म संस्कृतिका मानिसले साथ दिए जस्तै आफूले पनि साथ दिएको बताए । उनले भने, ‘के यहाँ सुकुम्बासी र गरिबको पक्षमा समर्थन गर्दा अपराध हो ? उनीहरू अगाडि बढ्न नपाउने भन्ने कही लेखेको छ ?’