काठमाडौँ । नुवाकोट जिल्लाका तारेकेश्वर गाउँपालिका निवासी जनक ढुंगानाले आफ्नो मृत बुवा आमाको सम्झनामा पुल बनाएका छन् । उनले दुई जिल्लालाई जोड्ने पुल बनाएका हुन् ।

ढुंगानाले धादिङ जिल्लास्थित नीलकण्ठ नगरपालिका ५ मा आफ्नो मृतक बुवा आमाको सम्झनामा धादिङ र नुवाकोट जिल्ला जोड्ने पुल बनाएका हुन् । नीलकण्ठ नगरपालिकास्थित फ्याक्से खोला र खानी खोलाको संगमस्थलका रुपमा रहेको त्यो खोलामा आवत जावत गर्न कुनै स्रोत साधन नभएको स्थानीयहरूले सास्ती भोग्दै आएकाले पुल निमार्ण गरेको उनले मेरोन्युजलाई जानकारी दिए ।

देउराली छामे, जोगी डाँडा, जामुने, गैरी वर्र्षालगायतका क्षेत्रका मानिसहरूलाई नुवकोटको क्युरिनी निस्कने आधार बनेको उक्त पुलको सहायताले धेरै सहज भएको स्थानीयले बताएका छन् ।

दैनिक उपभोग्य वस्तु आयात र निर्यात गर्न सोही बाटो प्रयोग गर्न पाउँदा स्थानीयहरू हर्षित भएका छन् । जोगी डाँडा निवासी एक स्थानीयले भने, ‘यो पुल निमार्ण हुनुपूर्व धेरै लामो बाटा उपभोग्य वस्तु आयात निर्यातमा जानु पर्ने हुन्थ्यो, सास्ती भोग्नु परेको थियो, तर यो पुल निमार्ण भएपछि सहज भएको छ ।’

‘मानिसहरुले दैनिक रुपमा भोग्नु परेको सास्ती देखेपछि मैले सोही ठाउँमा आधार बनाएर आफ्नो स्वर्गीय बुवा आमाको सम्झनामा पुल निमार्ण गरेको हुँ,’ पुल निर्माणकर्ता ढुंगानाले भने ।

उक्त पुल निमार्णका ३ लाख ९० हजार ५ सय ८५ रुपैयाँ खर्च गरेको उनले बताए । शिक्षण पेसा गर्दै आएका उनी २०७४ सालदेखि अवकास जीवन बिताइरहेका छन् ।