काठमाडौं । नवगठित नेकपा (एकीकृत समाजवादी) पार्टीका अध्यक्ष एवम् संसदीय दलका नेता माधवकुमार नेपालले तत्काल मन्त्रिपरिषद् विस्तार नहुने बताएका छन् ।

बिहीबार बिहान नेकपा माओवादी केन्द्रका अध्यक्ष पुष्पकमल दाहाल प्रचण्डसँगको भेटपछि अध्यक्ष नेपालले भदौं २३ गते अघि मन्त्रिपरिषद विस्तार हुने सम्भावना नरहेको स्पष्ट गरे ।

भदौ २२÷२३ गतेसम्म त मन्त्रिपरिषद विस्तारका बारेमा कसैले चुईक्क पनि नबोल्ने नेता नेपालले बताए । यद्यपि सरकार विस्तारकाबारेमा भने प्रचण्डसँग छलफल नभएको बताए ।

सिंहदबारस्थित पार्टी संसदीय दलको कार्यालयमा एकीकृत समाजवादीका अध्यक्ष नेपालले पदभार ग्रहण गरेका थिए ।

ओलीको भ्रममा नपर्न कार्यकर्तालाई अपिल

एकीकृत समाजवादीका अध्यक्ष नेपालले केपी ओलीको भ्रममा नपर्न पनि पार्टीका नेता कार्यकर्तालाई अपिल गरेका छन् । उनले प्रदेश सभाका सांसदसहितका जनप्रतिनिधिहरुलाई पनि ओलीको भ्रममा नपर्न आग्रह गरे ।

केपी ओली र उनका मान्छेहरुले दश बूँदे सहमतिको भ्रमपूर्ण व्याख्या गरिरहेको उल्लेख गर्दै उनले त्यसको भ्रममा नपरी आफ्नो पार्टीमा आउन पनि एमालेका नेता, कार्यकर्तालाई आग्रह गरे ।

माओवादीसँग एकता हुँदैन

नेता नेपालले आफ्नो पार्टीले माओवादी केन्द्रसँग एकता नगर्ने बताएका छन् । क्रान्तिकारी विचारको आधारमा निर्माण भएको आफ्नो पार्टी माओवादी केन्द्रसँग विलिन हुने भ्रम नछर्न पनि उनले सचेत गराए ।

आफ्नो पार्टी क्रान्तिकारी विचारका आधारमा निर्माण भएको उल्लेख गर्दै उनले आफ्नो पार्टी माओवादी केन्द्रमा मिल्छ वा विलिन हुन्छ भन्ने भ्रममा नपर्न आग्रह गरे ।

आफ्नो पार्टी क्रान्तिकारी विचारको आधारमा निर्माण भएको नेता नेपालको भनाई थियो ।

अध्यक्ष नेपालले आफ्नो पार्टीविरुद्ध केपी ओलीले कुप्रचार गरिरहेको उल्लेख गर्दै त्यसलाई चिरेर अघि बढन सफल हुने पनि दावी गरे ।