काठमाडौँ । पछिल्लो समय कृषि बिमा गर्नेको संख्या बढेको छ । बिमा समितिका अनुसार गत आर्थिक वर्ष २०७७÷७८ मा बाली तथा पशुपन्छी बिमाबापत १ लाख ७६ हजार १ सय ९५ बिमालेख विक्री भएको हो ।

जसबाट १ अर्ब ७७ करोड ५६ लाख ८३ हजार रुपैयाँ बिमाशुल्क संकलन भएको छ । त्यसमध्ये बाली बिमातर्फ १४ करोड ५९ लाख ५० हजार र पशुपन्छी तथा माछा बिमातर्फ १ अर्ब ६२ करोड ९७ लाख ३३ हजार रुपैयाँ बिमाशुल्क संकलन भएको बिमा समितिले जनाएको छ ।

अघिल्लो आर्थिक वर्ष २०७६/७७ को तुलनामा गत आर्थिक वर्षमा बिमालेख संख्या ३६ दशमलब ५८ प्रतिशतले बढेको थियो । यस्तै बिमाशुल्क संकलनमा ५० दशमलब २७ प्रतिशतले वृद्धि भएको थियो । अघिल्लो आर्थिक वर्षमा १ लाख ३९ हजार वटा बिमालेख विक्री भएको थियो भने १ अर्ब १८ करोड १६ लाख ९९ हजार बिमाशुल्क संकलन भएको थियो ।

बिमा समितिले स्थानीय तहसँगको सहकार्यमा कृषि बिमाको प्रचार प्रसार अगाडि बढाएसँगै कृषि बिमा गर्नेको संख्या बढ्दै गएको समितिको तत्थ्यांकमा उल्लेख छ ।

ग्रामिण भेगमा अझै पनि बिमाको जनचेतना व्यापक हुन नसक्दा कृषि बिमा गर्दा हुने फाइदाबाट कतिपय कृषक वञ्चित छन् ।
कृषि बिमा बढेसँगै दाबी भुक्तानी पनि बढ्दै गएको छ ।

गत आर्थिक वर्षमा ६४ करोड ३० लाख ३५ हजार रुपैयाँको दाबी भुक्तनी परेको छ । दाबी भुक्तानी संख्या अघिल्लो वर्षको तुलनामा ५० दशमलब २७ प्रतिशतले वृद्धि भएको समितिले जनाएको छ ।

प्राकृतिक विपत्तिले कृषि क्षेत्रमा निम्त्याउने क्षतिलाई बिमाले केही हदसम्म बहन गर्ने हुँदा नेपाल जस्तो कृषि प्रधान देशमा कृषि बिमाको आवश्यकता बढ्दै गएको छ ।