काठमाडौं । अमेरिकी सहयोग परियोजना (एमसीसी) विरोधी आन्दोलनप्रति गृहमन्त्रालयले कारबाही थालेको छ ।

एमसीसी लगायतका विदेशी दातृसंस्थाहरुको सहयोग विरुद्ध आन्दोलन नगर्न गृहमन्त्रालयले शुक्रबार विज्ञप्ति निकालेर चेतावनी दिएको थियो ।

गृहमन्त्रालयको विज्ञप्तिमा एमसीसीविरुद्धको अभिब्यक्ति र गतिविधिको सुक्ष्म रुपमा निगरानी राख्ने, विश्लेषण गर्ने र त्यस्ता गतिविधि गर्ने उपर प्रचलित कानून अनुसार कडा कारबाही गर्ने उल्लेख छ । गृहको चेतावनीयुक्त विज्ञप्तिपछि आन्दोलनकारी समातिन थालेका छन् ।

सोमवार विहान एमसीसी खारेजीको माग गर्दै काठमाडौंस्थित अमेरिकी दूतावास अगाडि विरोध प्रदर्शन गर्ने ६ जना युवालाई प्रहरीले पक्राउ गरेको छ । मोहन वैद्य नेतृत्वको नेकपा (क्रान्तिकारी माओवादी) सम्बद्ध क्रान्तिकारी विद्यार्थीहरुले विहान एमसीसीविरुद्ध दूतावासअघि प्रदर्शन गरेका थिए ।

क्रान्तिकारी माओवादी निकट अखिल (क्रान्तिकारी) का अध्यक्ष हरिकृष्ण गजुरेल, महासचिव पेशल दाहाल लगायतलाई प्रहरीले पक्राउ गरेको हो ।

पक्राउ पर्नेमा क्रान्तिकारीका सचिव महेश श्रेष्ठ, केन्द्रीय सदस्य मीनप्रसाद गिरी लगायत छन् । आफूसहित पक्राउ परेका ६ जनालाई महाराजगञ्जस्थित प्रहरीवृत्तमा राखिएका गजुरेलले बताए ।

एमसीसीकी उपाध्यक्ष फातेमा जे सुमर, जोनाथन ब्रुक्स यसैसाता नेपाल भ्रमणमा आउने तयारी गरेपछि एमसीसीको विपक्षीमा रहेका संघ संगठनहरु आन्दोनमा उत्रिएका छन् ।

यो पनि पढ्नुस्

सत्ता सहयात्री दलको आन्दोलन, गृहको धम्की