काठमाडौँ । नेकपा एमालेको रिटमाथि सर्वोच्च अदालतमा आज सुनुवाई हुँदैछ । न्यायाधीशहरू दीपक कार्की र कुमार चुडालको संयुक्त इजलासमा एमालेको रिटमाथि सुनुवाई गर्न पेसी तोकिएको छ ।

एमालेले सभामुख अग्निप्रसाद सापकोटा र निर्वाचन आयोगविरुद्ध सर्वोच्च अदालतमा रिट दायर गरेको छ । एमालेले पार्टीको साधारण सदस्य र सांसदबाट निष्कासन गरेका १४ सांसदलाई सभामुखले पदमुक्त नगरेको र निर्वाचन आयोगले कारबाही गरेका सांसदको सनाखत गरी नयाँ दल दर्ता गरेको भन्दै उनीहरुविरुद्ध अदालत गएको थियो ।

एमालेले माधव कुमार नेपालसहित १४ सांसदलाई निष्कासन गरेको पत्र भदौ १ गते संसद सचिवालय र निर्वाचन आयोगमा पठाएको थियो । तर सचिवालयले सूचना टाँस नगरेपछि माधव नेपालले एमाले विभाजन गरी नयाँ दल दर्ता गर्न निर्वाचन आयोगमा निवेदन दिएका थिए ।

आयोगले नेकपा एकीकृत समाजवादीलाई दलको मान्यता दिइसकेपछि मात्र संसद सचिवालयले नयाँ दल दर्ता भइसकेकाले कारवाही गर्नु नपर्ने सूचना टाँस गरेको थियो । पार्टीले कारबाही गरेका सांसदहरुलाई सभामुखले पदमुक्त नगरेको भन्दै एमालेले संसद् बैठक अवरोध गर्दै आएको छ । रिटमा एमालेले १४ सांसदलाई पदमुक्त गरिदिन माग गरेको छ ।