काठमाडौं । स्यानिटरी प्याडमा कर नबढाएको अर्थ मन्त्रालयले स्पष्ट गरेको छ । स्यानिटरी प्याडमा समेत सरकारले कर बढाएको भन्दै सामाजिक सञ्जालमा आलोचना भएपछि अर्थमन्त्रालयको सचिवलायले शुक्रबार विज्ञप्ति जारी गर्दै कर नबढाएको जनाएको हो ।

स्यानिटरी प्याडमा कर बढाइएको भन्दै केही संघसंस्थाहरुले प्रदर्शनसमेत गरेका थिए ।

स्यानीटरी प्याड आयातमा आ.व. २०६९/७० अघिदेखि लाग्दै आएको १५ प्रतिशत भन्सार महशुल आर्थिक ऐन २०७८ मा जस्ताको तस्तै कायम राखिएको दाबी गरिएको छ ।

कर बढाएको नभई स्यानीटरी प्याड उत्पादन गर्ने स्वदेशी उद्योगमा प्रयोग हुने कच्चा पदार्थ आयातमा लाग्दै आएको १० प्रतिशत भन्सार महशुल आधा घटाएर ५ प्रतिशत मात्र कायम गरिएको विज्ञप्तिमा उल्लेख छ ।

‘ऐनमा स्पष्टसँग लेखिएको कुराको तथ्यपरक अध्ययन नगरी वा जानी जानी गलत र भ्रामक हल्ला फैलाएर जनमानसमा नकारात्मक सन्देश प्रवाह गर्न खोज्ने तत्वहरुको भ्रममा नपर्न हार्दिक अनुरोध गर्दछौं ।’– जारी विज्ञप्तिमा भनिएको छ ।