काठमाडौं । राष्ट्र बैंकले नेपाल सुनचाँदी व्यवसायीसँग सुनको विवरण माग गरेको छ ।

सुनको आयात बढी भएकाले शोधान्तर घाटा चुलिएको छ । दुई महिनाको अवधिमा सरकारले व्यवसायीलाई १ हजार ४ सय केजी सुन वितरण गरेपनि सुनचाँदीको सिजन नभएकाले ठूलो मात्रामा सुनको खपत बढेकोले राष्ट्र बैंकले व्यवसायीसँग लिखित रुपमा कसरी सुन वितरण भइरहेको छ भनेर विवरण माग गरेको हो ।

दैनिक २० केजी सुन वितरण हुँदा पनि बजारमा सुनको अभाव भएको व्यवसायीले बताउँदै आएकाले केन्द्रीय बैंकले बजारमा व्यवसायीलाई सुन कसरी वितरण गरेको छ त्यसको विवरण उपलब्ध गराउन पत्र पठाएको सूनचाँदी व्यवसायी महासंघका पूर्व अध्यक्ष मोहन कुमार सुनारले जानकारी दिए ।

उनले राष्ट्र बैंकले व्यवसायीलाई कति आवश्यक र कसरी वितरण गरिरहेको, प्रयाप्त पुग्छ वा पुग्दैन भन्ने थाहा पाउनको लागि व्यवसायीसँग विवरण माग गरेको हुनसक्ने बताए ।

महासंघमा देशभरका ७ हजार बढी व्यवसायी प्रत्यक्ष रुपमा आबद्ध छन् । राष्ट्र बैंकले दिने दैनिकी २० केजी सुनमा १० केजी बाग्मती प्रदेश र १० केजी अन्य देशका विभिन्न जिल्लामा बाँडफाँड हुने गरेको महासंघले जनाएको छ ।

सबै व्यवसायीबाट विवरण उपलब्ध भएमा अर्को हप्ता लिखित रुपमा जवाफ दिने तयारीमा रहेको महासंघको दाबी छ ।