काठमाडौं । भन्सार विभागबाट हालै जारी भएको भन्सार निर्देशिकाकाबारेमा भन्सार विभागका महानिर्देशक नारायणप्रसाद सापकोटासँग नाडाका प्रतिनिधि मण्डलले छलफल गरेको छ ।

नाडाका अध्यक्ष कृष्णप्रसाद दुलालको नेतृत्वमा गएको ६ सदस्यीय प्रतिनिधि मण्डलले भन्सार विभागका महानिर्देशक सापकोटालाई स्वागत गर्दे भन्सार विभागबाट हालै जारी भएको भन्सार निर्देशिका लगायतका विभिन्न विषयमा छलफल गरेको नाडाका महासचिव सुनील रिजालले जानकारी दिए ।

भेटका अवसरमा भन्सार विभागका महानिर्देशक सापकोटाले विभागले व्यवसायीहरुका लागि सहजीकरण गर्ने बताउँदै व्यवसायीहरुका लागि अनलाइन पेमेण्ट र भेहिकल स्क्यानरको व्यवस्था समेत गरिने जानकारी दिए ।

सो अवसरमा अध्यक्ष दुलालले नेपालको अटोमोवाइलक्षेत्र राज्यलाई सर्वाधिक राजश्व बुझाउनेक्षेत्र भएको उल्लेख गरे ।

दुलालले नाडा र भन्सार विभागविच सूचना आदान प्रदान गर्ने विषयमा सहकार्य गरेर अघि बढने विषयमा लिखित समझदारी समेत भइसकेकोबारेमा सापकोटालाई जानकारी दिएका थिए ।

छलफलमा भाग लिँदै नाडाका महासचिव सुनिल रिजालले एचएस कोड परिवर्तन र साफ्टा सुविधा अन्तर्गत आउने अटोमोवाइल वस्तुहरुको बर्गिकरणमा स्पष्टता हुनुपर्ने बताए ।

यस्तै नाकाडाका कोषाध्यक्ष सुरेन्द्र उप्रेतीले एलसी खोली व्यवसाय गर्दा पनि भन्सार नाकाहरुमा पर्ने समस्याहरुबारे जानकारी गराएका थिए ।