काठमाडौं । कोरोना संक्रमण फैलिएपछि डेढ वर्षअघिदेखि बन्द रहेको नेपाल–भारतको जोगबनी नाका शनिवारदेखि खुलेको छ ।

कोभिड महामारी फैलिएपछि रोकथाम र नियन्त्रणका लागि भन्दै विराटनगरको रानी र भारतको जोगवनी जोड्ने नाका डेढ वर्षदेखि बन्द गरिएको थियो ।

नेपाल सरकारको असोज ११ गते बसेको मन्त्रिपरिषद बैठकले नाका खोल्ने निर्णय गरे पनि जिल्ला प्रशासन कार्यालय मोरङले अनुमति दिएको थिएन । उक्त नाकाबाट सवारी साधान आवतजावत गर्न रोक लगाइए पनि मानिसहरुको आउजाउ भने भइ नै रहेको थियो ।

मोरङका प्रमुख जिल्ला अधिकारी काशीराज दाहालकाअनुसार भारतसँगको सीमावर्ती जोगबनी नाका शनिबारबाट पूर्ण रुपमा खुलेपछि सवारी साधनहरु पनि सञ्चालनमा आएका छन् ।

नाका खुला भए पनि भारतबाट आउने व्यक्तिहरूले आवश्यक सुरक्षा मापदण्ड अनिवार्य पूरा गर्नुपर्ने प्रशासनले जनाएको छ ।