काठमाडौं । वाणिज्य, आपूर्ति तथा उपभोक्ता संरक्षण विभागले काठमाडौ न्यूरोडका ५ वटा पसलहरुलाई कारबाही गरेको छ ।

पसलहरु नियमानुसार सञ्चालन नभएको पाइएपछि न्यूरोडको खिचापोखरीका पाँच पसलहरुलाई विभागले कारबाही गरेको हो ।

कारबाहीमा परेका तीन वटा पसलहरुले दर्ता नै नगरीकन पसल सञ्चालन गरेको पाइएपछि विभागले १५/२० हजार रुपैयाँका दरले कारबाही गरेको वाणिज्य, आपूर्ति तथा उपभोक्ता संरक्षण विभागका निरीक्षण अधिकृत अमितकुमार झाले बताए ।

निरीक्षण अधिकृत झाले नियमानुसारको मापदण्ड पालना नगरेको दुई वटा पसलहरुमा भने मुख्य व्यापारी नै पसलमा नभएकोले तीन दिनको समय दिएर कारबाहीका लागि विभागमै उपस्थित हुन निर्देशन दिएको बताए ।

न्यूरोडको खिचापोखरीमा ७ वटा पसलहरुमा अनुगमन गर्दा पाँच पसललाई कारबाही गरिएको निर्देशक झाले बताए । न्यूरोडका पसलहरुसमेत दर्ता नै नगरी सञ्चालन गरेको भेटिएको निर्देशक झाले बताए ।

सरकारले चाडपर्वलाई लक्षित गरी केही दिनयता देशैभरी नै बजार अनुगमनलाई तीव्रता दिइरहेको छ ।