काठमाडौँ । प्रधानमन्त्री शेरबहादुर देउवा जलवायु परिवर्तनसम्बन्धी राष्ट्रसंघीय खाका संरचना महासन्धि (यूएनएफसीसीसी) को २६औं सम्मेलन (कोप–२६)मा भाग लिन बेलायत जाँदैछन् । १२ देखि २६ कात्तिकसम्म स्कटल्यान्डको ग्लास्गोमा हुने कोपमा सहभागी हुन प्रधानमन्त्री देउवा आज जान लागेका हुन् ।

प्रधानमन्त्री देउवा २० सदस्यीय टोली लिएर बेलायत जाँदैछन् । टोलीमा वन तथा वातावरणमन्त्री रामसहाय यादव, वन तथा वातावरण सचिव पेमनारायण कँडेल, अर्थ सचिव मधुकुमार मरासिनी, ऊर्जा सचिव देवेन्द्र कार्की, गृह सचिव टेकनारायण पाण्डे, परराष्ट्र सचिव भरतराज पौड्याल र राष्ट्रिय योजना आयोगका सचिव केवलप्रसाद भण्डारी रहेका छन् ।

कोप–२६ मा विश्वका राष्ट्र र सरकार प्रमुख सहभागी हुनेछन् । देउवा नोभेम्बर १ मा कोप–२६ को औपचारिक उद्घाटनमा सहभागी हुनेछन् । नोभेम्बर १ को साँझ बेलायती प्रधानमन्त्री बोरिस जोन्सनले विश्वका राष्ट्र र सरकार प्रमुखहरूका लागि आयोजना गरेको रिसेप्सनमा प्रधानमन्त्री देउवा सहभागी हुनेछन् ।

यस्तै प्रधानमन्त्री देउवाले भारतीय प्रधानमन्त्री नरेन्द्र मोदीसँग भेटवार्ता पनि गर्ने छन् । उनीहरुबीच स्कटल्याण्डको ग्लास्गोमा भेटवार्ता हुनेछ । प्रधानमन्त्री देउवा आज स्कटल्याण्ड गएर १८ गते स्वदेश फर्किने छन् ।