काठमाडौँ । सेतै फुलेका कपाल । चाउरी परेकाे अनुहार । हातका एउटा कपडाकाे पाेकाे । बुड्याैली उमेरमा लाैरी टेक्दै काठमाडाैँ आइपुगे, बलराम भगत ।

सुनसरीबाट काठमाडाैँको यात्रा गर्दा चमकले भरिएका भगतकाे अनुहार अहिले निराश बनेको छ । न्यायको खोजी गर्दै काठमाडाैँ यात्रा गरेका उनी खाली हात घर फर्किने भएका छन् । सोमबार आफ्नो मुद्दाको सुनुवाई हुने भएपछि उनी शनिबार काठमाडाैँ आइपुगेका थिए ।

हातमा खर्ची समेत नभएका उनी काठमाडाैँ आइपुगेकै दिन गाैशालास्थित धर्मशालामा बस्न सुरू गरे । आइतबार आफ्नो मुद्दाकाे सुनुवाईबारे जानकारी लिन सर्वोच्च अदालत पुगे । लामाे समय आफ्नाे मुद्दाको सुनुवाई पर्खेर बसेका उनी अदालत परिसरकाे आन्दोलनले निराश भए ।

आफ्नो पुर्खादेखि भोग चलन गर्दै आएको ६ धुर जग्गा अरूले हडपेपछि उनी न्यायको खाेजीमा भाैतारिरहेका हुन् । न्यायका लागि सर्वोच्चसम्म आइपुगेका उनी पटकपटक रित्तो हात घर फर्किदै आएका छन् ।

आइतबार आफ्नो मुद्दाको सुनुवाईबारे जानकारी लिन भगत अदालत नपुग्दै सर्वोच्च परिसरमा आन्दोलन सुरू भइसकेको थियो । कानून व्यवसायीहरूले प्रधानन्यायाधीश चोलेन्द्र शमशेरविरुद्ध प्रर्दशन गरी काम ठप्प बनाएका थिए । भगतले अदालतमा के हुँदै छ भन्ने थाहा पाएनन् ।

कुरा बुझ्दै जाँदा आफ्नो काम नहुने देखेपछि उनी सर्वोच्चबाट फर्किए । न्याय दिने व्यक्तिहरू नै आन्दोलनमा देखेपछि उनी आफू बस्ने धर्मशालामा नै बस्ने कि घर फर्किने भन्ने दोधार मन लिएर सर्वोच्चबाट बाहिरिए ।

यस्तै, काठमाडौँकै काभ्रेस्थलीबाट न्यायका लागि सर्वोच्च आइपुगेका एक सेवाग्राही रित्तो हात घर फर्के । उनको अंश भागबण्डासम्बन्धि मुद्दा सर्वोच्च अदालतमा रहेको छ । उनको मुद्दामा एक वर्षदेखि सुनुवाई हुन सकेको छैन । न्यायकाे आशमा वर्ष दिनदेखि सर्वोच्च धाइरहेका उनी न्याय पाउन नसकेको भन्दै दु:खेसो पोखे ।

काम छाडेर आदलत धाउँदा नि न्याय नपाउँदा दुःख लागेको उनले बताए । सर्वोच्च अदालतमा न्यायका लागि आउने यी प्रतिनिधि पात्र मात्रै हुन् । न्यायको आश गर्दै टाढाबाट आएका सर्वसाधारणहरू न्यायाधीश र कानून व्यवसायीको आन्दोलन देखेर निराश हुँदै घर फर्किएका छन् ।

प्रधानन्यायाधीश शमशेरको राजीनामा माग गर्दै कानून व्यवसायीहरूले आजदेखि प्रदर्शन थालेका छन् । नेपाल बार एशोसिएसनको नेतृत्वमा कालो पट्टी बाँधेर अदालत परिसरमा नै विरोध प्रदर्शन भएको हो ।

यस्तै केही कानून व्यवसायी भने प्रधानन्यायाधीशको बचाउनमा हातमा सेतो पट्टी बाँधेर प्रदर्शनमा उत्रिएका छन् । कानून व्यवसायीको प्रदर्शनले सर्वसाधारण न्यायबाट बञ्चित भएका छन् ।