काठमाडौँ । जिल्ला ट्राफिक कार्यालय तनहुँले ट्राफिक नियमविपरीत सवारी साधन चलाउनेलाई कारबाही गरेको छ । प्रहरीले त्यस्ता सवारी साधनलाई कारबाही गर्दा एकैदिन एक लाख ३५ हजार ५ सय राजश्व संकलन गरेको हो ।

प्रहरीले गत बिहीबार दुई पांग्रे र चार पांग्रे १८२ सवारी साधनलाई कारबाही गर्दा उक्त राजश्व संकलन भएको हो । मदिरा सेवन गरी सवारी चलाइएको पाइएमा हिरासतसम्म राखिने छ । सचेतनामूलक प्लेकार्ड राखेर जाँच गरिएको गर्दा कारबाही पर्नेमा अत्यधिक मात्रामा मोटरसाइकल रहेको जिल्ला ट्राफिक कार्यालय तनहुँका प्रमुख सई डोलेन्द्र हमालले जानकारी दिए ।

साथमा आवश्यक कागजात लिएर यात्रा नगर्ने, क्षमताभन्दा बढी यात्रु बोक्ने र गाडीको मोडिफाइ गर्ने सवारीलाई कारबाही गर्दा उक्त रकम संकलन भएको उनले बताए । जिल्लाको पृथ्वीराज मार्गअन्तर्गत पूर्वको आँबुखैरेनीदेखि पश्चिमको कोत्रेसम्मको करिब ७२ किलोमिटर क्षेत्रका साथै भित्री सडक मार्गमा सवारी जाँच गरिएको उनले जानकारी दिए ।

कतिपय चालकलाई आउँदा दिनमा गल्ती नदोहोर्याउने शर्तमा एकपटक सम्झाएर छाडिएको जिल्ला ट्राफिक कार्यालय तनहुँले जनाएको छ । जिल्ला प्रहरी कार्यालय र जिल्ला ट्राफिक कार्यालय तनहुँको संयुक्त प्रयासमा तनहुँमा पछिल्लो समय सवारी जाँच कार्यलाई कडाई गरिँदै आइएको छ ।

चाडपर्वका समयमा मदिरा सेवन गरी सवारी साधान चलाउनेको संख्या बढ्ने भएकाले जाँच कार्यलाई निरन्तरता दिँदै आइएको जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सेनाले जानकारी दिए ।