काठमाडौँ । सरकारले १२ वर्षमाथिका दीर्घ रोगीलाई कोभिड-१९ विरुद्धको फाइजर खोप दिँदैछ । सरकारले आजदेखि १२ वर्षमाथिका आठ प्रकारका दीर्घरोगीलाई फाइजर खोप दिन लागेको हो ।

आजदेखि सुरु भएको खोप अभियान मंसिर चार गतेसम्म चल्नेछ । सरकारले खोप लगाउनका लागि देशभर २४ वटा अस्पताल तोकेको छ । खोप काठमाडौँ उपत्यकाभित्रका ८ र बाहिरका १६ गरी जम्मा २४ वटा अस्पतालका खोप केन्द्रमा लगाइने छ । सरकारले तोकेका अस्पतालहरुमा बिहान १० देखि ४ बजेसम्म फाइजर खोप लगाउन पाइनेछ ।

खोप लगाउन जाँदा अस्पताल वा डाक्टरले सिफारिस गरेको दीर्घरोगको उपचारसम्बन्धी पुर्जा लिएर जानुपर्नेछ । खोपको दोस्रो मात्रा मङ्सिर २७ गतेदेखि पुस २ गतेसम्म सञ्चालन हुनेछ । कोभ्याक्स सुविधामार्फत आएको फाइजर खोप करिब ५० हजार दीर्घ रोगीले पाउने बताइएको छ ।