काठमाडौँ । नेकपा एकीकृत समाजवादीका अध्यक्ष माधवकुमार नेपालले कृषि क्षेत्रमा गुणात्मक परिवर्तनको आवश्यकता रहेको बताएका छन् । सोमबार काठमाडौँमा आयोजित अखिल नेपाल किसान महासंघ राष्ट्रिय समितिको घोषणा तथा सपथ ग्रहण समारोहलाई सम्बोधन गर्दै उनले यस्तो बताएका हुन् ।

अध्यक्ष नेपालले कृषि क्षेत्रको आधुनिकीकरण, व्यवसायीकरण र यान्त्रिकीकरण गर्न सकेमा अर्थतन्त्रमा आमूल परिवर्तन हुने धारणा राखे । ‘कृषि क्षेत्रमा रुपान्तरण गर्ने कुराबाट हामी बिमुख हुन सक्दैनौँ, हाम्रो फोकस नै त्यसमा हुनु पर्दछ, नेपाली अर्थतन्त्रको बलियो आधारशीला भनेको कृषि क्षेत्रको रुपान्तरण हो,’ उनले भने, ‘कृषि क्षेत्रको आधुनिकीकरण, व्यवसायिकरण र यसको यान्त्रिकीकरण काम गर्न सकियो भने मात्रै यसमा आमूल परिवर्तन गर्न सकिन्छ, कृषि क्षेत्रमा मात्रात्मक होइन, गुणात्मक परिवर्तनको आवश्यकता छ ।’

अध्यक्ष नेपालले कम्युनिष्ट पार्टीहरु किसानको मुक्तिका लागि बनेको भन्दै किसान आन्दोलन उठाउन वामपन्थी शक्तिको भूमिका महत्वपूर्ण हुने बताए । उनले सुकुम्बासीहरूको समस्या समाधानमा सरकारले ध्यान पु¥याउनु पर्ने धारणासमेत राखेका थिए ।