काठमाडौँ । आसन्न १४ औं महाधिवेशनको तयारीमा रहेको नेपाली कांग्रेसभित्र प्रदेशसभास्तरीय क्षेत्रीय अधिवेशनमा नै कार्यकर्ताबीच कुटाकुट हुन थालेको छ ।

रुपन्देही क्षेत्र नम्बर ३ मा क्षेत्रीय अधिवेशनको मतगणना चलिरहँदा पार्टीको एकअर्का समूहबीच कुटाकुट भएको छ । बरिष्ठ नेता रामचन्द्र पौडेल समूहले देउवा समूहबाट र देउवासमूहले पौडेलसमूहबाट आक्रमण भएको आरोप लगाएका छन् ।

कार्यकर्ताहरु आफूआफूमै कुटाकुट भएपछि मतगणनाको काम पनि रोकिएको छ । पौडेलसमूहले हार ब्यहोरेपछि विवाद झिकेको संस्थापन पक्षको आरोप लगाएका छन् ।

आफ्नो समूहको लज्जास्पद् हार भएको र कार्यसमितिमा पनि हार हुने निश्चित भएपछि कांग्रेस रुपन्देहीका पूर्वसभापति रामचन्द्र ढकाल, प्रतिनिधिसभा सांसद भरतकुमार शाह, लुम्बिनी प्रदेशसभा सांसद रमा अर्याल, प्रदेशसभाको निर्वाचनका प्रत्याशी हरि न्यौपानेले लफडा झिकेको संस्थापन समूहले जनाएको छ ।

प्रदेशसभा सांसद अर्यालका श्रीमान हेमराज अर्याल प्रदेश प्रतिनिधिमा पराजित भएपछि विवाद चर्काएको सो समूहको आरोप छ ।

कांग्रेसको पार्टी कार्यालय भैरहवामा मतगणनाका क्रममा शुक्रबारराति दुई पक्षबीच भएको झडपमा पाँच जना घाइते भएका छन् । झडपमा कांग्रेसका पौडेल पक्षका नेता तथा कार्यकर्ता घाइते भएका छन् । संस्थापन पक्षले बत्ती अफ गरेर आक्रमण गरेको पौडेल पक्षको आरोप छ ।

यो निर्वाचन क्षेत्रमा १६ क्षेत्रीय प्रतिनिधि मध्ये पौडेल समूहबाट एक जनामात्र निर्वाचित भएका छ । कार्यसमितिमा एक सय मतगणना हुँदा संस्थापनका उम्मेद्वार सुरेन्द्रजंग थापा १९ भोटले अगाडि थिए । प्रदेशसभा क्षेत्रीय सभापतिमा पौडेल समूहबाट पुरनप्रसाद श्रेष्ठ उम्मेदवार छन् ।

मतगणना कार्य जारी रहँदा कांग्रेसका दुई समूहका कार्यकर्ताबीच मतगणनास्थल बाहिर पनि झडप भएको थियो ।