काठमाडौं । सहिद स्मारक ‘ए’ डिभिजन लिगमा थ्रीस्टार क्लवले विजयी शुरुवात गरेको छ ।

त्रिपुरेश्वरस्थित दशरथ रंगशालामा भएको दोस्रो दिनको दोस्रो खेलमा शनिवार थ्रीस्टारले च्यासल युथ क्लबलाई ३–० ले पराजित गरेको हो ।

थ्रीस्टारका लागि खेलको २१ औं मिनेटमा निशान खड्काले, ४५ औं मिनेटमा बिदेशी खेलाडी राफायल र ५८ औं मिनेटमा अनन्त तामाङले गोल गरेका थिए ।

च्यासल युथले पाएको एक पेनाल्टीको अवसर पनि गुमाउन पुग्यो । च्यासलका लागि विकास मेराग्लियाले हानेको पेनाल्टी पोलबाट बाहिरियो ।

जीतपछि थ्री स्टारले ३ अंक जोडेको छ । थ्री स्टारले अर्को खेलमा ललितपुरकै सातदोबाटो युथ क्लबसंग खेल्नेछ भने च्यासलले विभागीय टोली नेपाल एपीएफ क्लबसंग खेल्नेछ ।

सहिद स्मारक ‘ए’ डिभिजन लिग अन्तर्गत शनिबारका पहिलो खेलमा संकट क्लव र हिमालयन शेर्पाले एक एक गोलको बराबरी गर्दै अंक बाँडेका थिए ।

लिगको आइतबारको खेलमा ब्रिगेड ब्वाईज क्लब र नेपाल एपीएफ क्लब तथा जावलाखेल युथ क्लब र मनाङ मस्र्याङदी भिड्नेछन् ।