काठमाडौँ । पेट्रोलियम पदार्थमा भएको मूल्य वृद्धिविरुद्ध आन्दोलन गर्दै आएको विद्यार्थी संगठनहरूले एक रुपैयाँ उठाएर नेपाल आयल निगमलाई दिने भएको छ । संयुक्त विद्यार्थी संगठनले मंगलबार शान्ति वाटिकामा प्रदर्शन गरी पैसा उठाएर निगमलाई दिने भएको हो ।

शान्ति वाटिकामा कार्यक्रम राखेर एक रुपैयाँ संकलन गरी आयल निगमलाई बुझाउने अखिल क्रान्तिकारीका नेता मिलन एमसीले जानकारी दिए ।

‘उपभोक्तालाई मारमा पारेर पेट्रोलियम पदार्थको वृद्धिप्रति हाम्रो आन्दोलन जारी छ, वैज्ञानिक ढंगले मूल्य घटाइनु पर्छ,’ उनले भने, ‘आयल निगमका कर्मचारीलाई पैसा नपुगेन भन्दैमा जनतालाई मारमा पार्न पाइदैन, त्यसैले हामीहरूले एक–एक रुपैयाँ उठाएर निगमलाई दिने भएका हौँ ।’

आन्दोलनमा नेकपा माओवादी केन्द्र निकट अखिल क्रान्तिकारी, नेकपा एकीकृत समाजवादी निटक अनेरास्ववियू, जनता समाजवादी पार्टी निकट समाजवादी विद्यार्थी युनियन, मोहन वैद्य नेतृत्वको नेकपा क्रान्तिकारी माओवादी निकट अखिल क्रान्तिकारी, नेत्रविक्रम चन्द नेतृत्वको नेकपा निकट अखिल क्रान्तिकारी, राष्ट्रिय जनमोर्चा निकट अखिल छैठौंले मूल्य वृद्धिविरुद्ध आन्दोलन गर्दै आएको छ ।