काठमाडौँ । नेकपा एमालेको १० औँ महाधिवेशनमा अध्यक्ष पदका लागि केपी शर्मा ओली र भीम रावल भिड्ने भएका छन् । चितवनको सौराहमा जारी महाधिवेशनको बन्दसत्र रोकेर आइतबार दिनभर छलफलमा बसेका अध्यक्ष ओलीविरुद्ध उपाध्यक्ष रावलले उम्मेदवारी दिने भएका हुन् ।

ओलीले रावललाई उपाध्यक्ष बस्न आग्रह गरेका थिए । तर रावलले उनको प्रस्तावलाई अस्वीकार गरे । ध्यरातमा सुरू भएको बन्दसत्रमा ३०१ जना केन्द्रीय सदस्यको नाम प्रस्ताव गरेका ओलीले अध्यक्ष मण्डलमा १९ जना पदाधिकारीको नाम प्रस्ताव गरेका थिए ।

बन्दसत्रको हललाई सम्बोधन गर्दै ओलीले भने, ‘मैले धेरैपटक भीम रावललाई उपाध्यक्षको उम्मेदवार बन्न आग्रह गरेँ, तर सम्झाउन सकिएन ।’

ओलीको प्रस्तावमा रावलले लामो बहस नगरी आफू अध्यक्षको उम्मेदवार हुने बताए । ‘रात गएर बिहान भयो कमरेडहरु सुत्न पाउनु भएको छैन, लामो बोल्दिनँ, मलाई फर्किन गाह्रो हुन्छ, अध्यक्षमा उम्मेदवारी दिन्छु,’ रावलले भने ।

एमालेको निर्वाचन अयोगका अनुसार आज बिहान ९ बजेपछि उम्मेदवारी दर्ताको समय तोकिएको छ ।