काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले राजनीतिक विचार भिन्न भए पनि राप्रपा र माओवादीको गोत्र एउटै भएको बताएका छन् । राप्रपा महाधिवेशनको उद्घाटनमा बोल्दै प्रचण्डले राजनीतिक विचार भिन्न भए पनि राप्रपा र माओवादी राष्ट्रियताका सवालमा राप्रपा र माओवादी एउटै भएको बताए ।

उनले भने, ‘राष्ट्र सबैभन्दा माथि छ । दलहरूबीचको संवादलाई अझ घनीभूत बनाएर राष्ट्रलाई वैदेशिक हस्तक्षेपबाट मुक्त बनाउनुपर्छ । त्यसका लागि सहकार्य जरुरी छ ।’

यस्तै प्रचण्डले नेकपा मालेका महासचिव सीपी मैनालीलाई राप्रपाको अध्यक्ष हुने तयारी गरेको भन्दै ब्यंग्य गरे । उनले मैनालीले विगतमा सशस्त्र आन्दोलन गरेको स्मरण गर्दै अहिले भाषा फेरिएको देख्दा अचम्ममा परेको बताए । यसअघि मैनालीले देशभक्तिको मामिलामा राजा महेन्द्रको योगदान सह्राहनीय रहेको बताएका थिए ।

यस्तै प्रचण्डले नेकपा एमालेको १०औं महाधिवेशनको ब्यंग्य गरेका छन् । उनले एमाले अध्यक्ष केपी शर्मा ओलीले पार्टी फुटाएर तीन टुक्रा बनाएको तर महाधिवेशन गर्दा भने एकताको महाधिवेशन भनेको भन्दै ब्यंग्य गरेका हुन् । उनले भने, तपाईँहरुले जे गर्नुभयो यो महाधिवेशनको नाम पनि त्यही राख्नुभयो । तपाईँहरू तीनवटा मिल्नुभयो र महाधिवेशनको नाम एकता महाधिवेशन राख्नुभयो । नेकपा पार्टी फुटाएर तीन टुक्रा पार्ने अनि एकता महाधिवेशन भन्ने पनि भर्खरै हामीले देखेका छौँ । त्यस्तो झूटो कुराचाहिँ तपाईँहरुले गर्नुभएन । पार्टी फुटाउने अनि नाम एकताको राख्ने ? तपाईँहरुले ठीक गर्नुभयो ।’ राप्रपाको एकताको महाधिवेशन आजबाट सुरु भएको छ ।