काठमाडौँ । सोमबार साँझ बैतडीमा भएको जीप दुर्घटनामा परी मृत्यु हुनेको संख्या पाँच पुगेको छ । पाटन नगरपालिका १ सकारकी ४० वर्षीया जानकी भट्टराईको पाटन स्वास्थ्य केन्द्रमा उपचारको क्रममा मृत्यु भएसँगै दुर्घटनामा ज्यान गुमाउनेको संख्या पाँच पुगेको हो ।

दुर्घटनामा नवविवाहित जोडीको समेत मृत्यु भएको थियो । दुर्घटनामा मृत्यु हुनेहरुमा सुर्नया गाउँपालिका १ का २४ वर्षीय प्रेम चुनारा, उनकी श्रीमती २० वर्षीया मनिषा विक, पाटन नगरपालिका १ सकारका १३ वर्षीय विनोद भट्टराई र ७२ वर्षीया रमा भट्टराई रहेका छन् ।

प्रेम र मनिषाबीच १० दिन अघि विवाह बन्धनमा बाँधिएका थिए । उनीहरु दुवै जना माइतीघर कैलपाल फर्किंदै गर्दा दुर्घटनामा परेका हुन् । प्रहरीका अनुसार दुर्घटनामा पाँच जना घाइते भएका छन् ।