विराटनगर । साढे ३३ क्वीन्टल सुन तस्करी प्रकरणका अभियुक्त कृष्णगोपाल अग्रवाल धरौटीमा छुटेका छन् । अग्रवाललाई जिल्ला अदालत मोरङले धरौटीमा छाड्ने आदेश दिएको हो ।

न्यायाधीश भरत लम्सालको इजलासले थुनछेक बहसपछि उनलाई २ लाख रुपैयाँ धरौटीमा छाड्ने आदेश दिएको हो ।

आइतबार पक्राउ परेका अग्रवाललाई प्रहरीले मंगलबार जिल्ला अदालत मोरङमा उपस्थित गराएको थियो ।

सुन तस्करी गिरोहका नाइने चुणामणि उप्रेती ‘गोरे’सहित ७७ जनाविरुद्ध दायर मुद्दामा अग्रवाल प्रतिवादी थिए ।

तस्करी गरेर ल्याएको साढे ३३ किलो सुन हराएपछि उक्त गिरोहले यातना दिने क्रममा भरिया सनम शाक्य मारिएका थिए ।

न्यायाधीश भरत लम्सालकै इजलासले सुन तस्करी एवं सनम शाक्य हत्या प्रकरणसम्बन्धी मुद्दाको फैसला गत असोज १९ गते गरेको थियो । पक्राउ परेका ५७ जनाले सुन तस्करी मुद्दामा सफाइ पाएका थिए भने शाक्य अपहरण र हत्या मुद्दामा ८ जनालाई दोषी ठहर भए ।

गोरेको समूहले २०७४ साल फागुन १८ गते मोरङको उर्लाबारी नगरपालिका–१ मा सनमको हत्या गरेको थियो । घटनाको भोलिपल्ट २०७४ फागुन १९ गते उनको मोरङमा शव भेटिएको थियो ।