काठमाडौं । कांग्रेस वरिष्ठ नेता रामचन्द्र पौडेल समूहको बैठक मंगलबार चार घण्टादेखि पूर्व महामन्त्री प्रकाशमानको निवास च्याक्सीबासीमा जारी छ ।

कांग्रेस नेताहरुको बैठक सिंह निवासमा भइरहँदा उनको निवास बाहिर भने कांग्रेसकै युवा कार्यकर्ताहरुले प्रदर्शन गरिरहेका छन् ।

सिंह निवास भित्र नेताहरुको बैठक जारी रहँदा बाहिर पौडेल समुहकै युवाहरुको एक समूहले साझा उमेदवार तय गर्न भन्दै प्लेकार्डसहित प्रदर्शन गरेको छ । उनीहरुले संस्थापन इतरको समूहलाई मिलेर अगाडि बढ्न दबाब दिएका हुन् ।

प्रदर्शनमा सहभागी नेपाल विद्यार्थी संघका पूर्व सह–महामन्त्री टेकराज पौडेलले कांग्रेसलाई एकतावद्ध बनाएर महाधिवेशनलाई एकताको महाधिवेशन बनाउन माग गर्दै आफूहरुले प्रदर्शन गरेको बताए । नेताहरुले त्याग गरेर भएपनि पार्टीलाई एकतावद्ध बनाएर अगाडि बढ्नुको विकल्प नभएको उनको भनाई छ ।

उनीहरूले अहिले नमिले कहिले मिल्ने, नेताहरू मिल्नुस् कांग्रेस जोगाउनुस्ु ,साझा उमेदावरको विकल्प छैन लगायतका सन्देश लेखिएका प्लेकार्ड बोकेका थिए ।