काठमाडौं । सत्ता गठवन्धनमा रहेका प्रमुख तीन दलका शीर्ष नेताहरुको भेटवार्ता भएको छ । २८ मंसिरदेखि संसदको बैठक बोलाईएको, न्यायलयभित्रको विवाद थाती रहेको र आगामी माघ १२ मा राष्टिय सभा चुनावलगायतका विषयमा दलहरुवीच आन्तरिक छलफल भईरहेका बेला माओवादी केन्द्रका अध्यक्ष पुष्पकमल दाहाल (प्रचण्ड), नेकपा एकीकृत समाजवादीका अध्यक्ष माधव नेपाल र जनता समाजवादीका संघीय परिषद्का अध्यक्ष डा बाबुराम भटटराई वीच भेटवार्ता भएको हो ।

सिंहदरवारस्थित एकीकृत समाजवादीको संसदीय दलको बैठकमा तीन नेतावीच भेटवार्ता भएको प्रचण्डका स्वकीय सचिव रमेश मल्लले जानकारी दिए ।

उनका अनुसार तीन नेताका वीचमा भेटवार्ता आधा घण्टा जस्तो भएको थियो । तर छलफलका विषयमा भने आफुले पनि जानकारी पाइनसकेको मल्लले मेरोन्यूजलाई बताए ।

सत्ता गठवन्धन दलकै अर्काे मुख्य घटक कांग्रेसको महाधिवेशन तयारी चलिरहेको र माओवादी केन्द्रले पनि राष्टिय सम्मेलनको तयारीका लागि अध्यक्ष प्रचण्ड दस्तावेज लेखनमा लागिरहेको बेला माधव नेपाल, प्रचण्ड र वावुराम भटटराईका वीचमा भेटवार्ता भएको हो ।

भेटवार्तामा दलहरु वीचको आगामी सहकार्य र एकताका विषयमा पनि केन्द्रीत रहेर कुराकानी भएको बताईएको छ ।