काठमाडौँ । ओमिक्रोन भाइरस तीव्र गतिमा फैलिएसँगै धनी राष्ट्रहरूले कोभिडविरुद्धको खोप भण्डारण गर्न सक्ने भन्दै विश्व स्वास्थ्य संगठन (डब्ल्युएचओ)ले चिन्ता व्यक्त गरेको छ । उसले धेरै मानिसहरूले खोप प्राप्त गर्न नसकेका राष्ट्रहरूमा खोप आपूर्तिमा प्रभावित पर्न सक्ने जनाएको छ ।

ओमिक्रोन भाइरसबाट जोगिनका लागि कतिपय धनी राष्ट्रहरूले बुस्टर डोजको मात्रा सार्वजनिक गर्ने तयारी गरेका छन् । हालसम्म उपलब्ध कोभिडविरुद्धका खोपहरू नयाँ भेरिएन्टविरुद्ध कम प्रभावकारी रहेको समेत उसले जनाएको छ ।

खोप उत्पादक फाइजर बायोएनटेकले गरेको पछिल्लो अध्ययनमा फाइजर खोपले कोभिडको मुख्य ‘स्ट्रेन’को तुलनामा ओमिक्रोनविरुद्ध एन्टिबडी उत्पादन गर्ने पाइएको छ । डब्लुएचओले भने सुरुवाती मात्रा उपलब्ध गराउने कार्य नै प्राथमिकतामा पर्नु पर्ने जनाएको छ ।

डब्ल्युएचओकी खोपसम्बन्धी निर्देशक केट ओ ब्रायनले धनी राष्ट्रहरूलाई खोप दान गर्ने कार्य जारी राख्न आग्रह गरेकी छन् ।
ओमिक्रोन हालसम्म फेला परेका कोभिडका प्रकारमध्ये सबैभन्दा बढी उत्परिवर्तित भेरिएन्ट हो ।

अमेरिकाका वरिष्ठ संक्रमक रोग विशेषज्ञ डा. एन्थोनी फाउचीका अनुसार प्रारम्भिक प्रमाणका अनुसार ओमिक्रोन निकै संक्रमक हुनसक्ने तर यसले मानिसहरूलाई तुलनात्मक रूपमा धेरै गम्भीर अवस्थामा भने नपुर्‍याएको देखिएको छ ।

जोन्स हप्किन्स विश्वविद्यालयको तथ्यांकअनुसार सन् २०२० मा महामारी सुरु भएयता विश्वभर ५० लाखभन्दा बढीले कोरोनाका कारण ज्यान गुमाइसकेका छन् । एजेन्सी