काठमाडौं । नेपाली कांग्रेसको महाधिवेशन उदघाटन समारोहमा नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ले राप्रपा अध्यक्ष राजेन्द्र लिङदेनको प्रतिवाद गरेका छन् ।
ओेली र प्रचण्डले सम्बोधन गर्नुअघि मन्तब्य राखेका लिङदेनले सबै राजनीतिक दलका नेताहरुलाई जनता चोर आए भन्ने गरेको टिप्पणी गरेका थिए ।
आफ्नो पालो आएपछि प्रचण्डले शुरुमै लिङदेनको आलोचना गरे । उनले कांग्रेस कार्यकर्तालाई मञ्चबाटै प्रश्नसमेत सोधे । लिङदनेको अभिब्यक्तिलाई उनले तानाशाहीको संज्ञा दिए । लिङदेनविरुद्ध प्रचण्ड मात्रै खनिएनन्, एमाले अध्यक्ष केपी शर्मा ओलीले पनि कडा आलोचना गरे ।
ओलीले लिङदेनलाई भर्खर भर्खर जन्मिएको बाच्छो हिँड्न नजानेको भनी टिप्पणी गरे । ओलीले लिङदनेको भनाईको प्रतिवाद गरे ।
कांग्रेस महाधिवेशनको शुभकामना दिन पुगेका नेकपा (एकीकृत समाजवादी)का अध्यक्ष माधव नेपालले भने लिङ्देनलाई सम्बोधन नगरी प्रतिगामी तत्वले फेरि शीर उठाउने प्रयास गरेको बताए ।
‘नेपालको राजनीतिमा कालो बादल मडारिन खोजिरहेको छ’, नेता नेपाले भने, ‘प्रतिगामी तत्वहरुलाई भन्न चाहन्छु, फेरि शीर उठाउने प्रयास नगर्नुस् ।’
उनले राजनीतिमा आउन राजालाई नयाँ पार्टी खोल्न सुझाव दिएका थिए । उनले राजालाई नयाँ पार्टी नखोले ब्यापार गरेर बस्न सुझाव दिए ।