काठमाडौँ । सत्तारुढ दल नेपाली कांग्रेसको जारी १४ औँ महाधिवेशनमा आज नयाँ नेतृत्व चयनका लागि उम्मेदवारी दर्ता हुने भएको छ । १६७ सदस्यीय केन्द्रीय कार्य समितिमध्ये १३ पदाधिकारी र १२१ जना केन्द्रीय सदस्यका लागि आज निर्वाचन हुने भएको हो ।

शुक्रबार उद्घाटन भएको महाधिवेशनमा उद्घाटनसत्र र बन्दसत्र सम्पन्न भएको छ । आज बिहान १० बजेदेखि साँझ ५ बजेसम्म राष्ट्रिय सभागृहमा सभापतिदेखि केन्द्रीय सदस्यसम्मको उम्मेदवारी मनोनयन दर्ता हुने कार्य तालिका रहेको छ ।

आइतबार अन्तिम नामावली प्रकाशित भएसँगै २७ गते बिहान ८ बजेदेखि मतदान सुरु हुने भएको छ । पदाधिकारीसहित १६७ सदस्यीय केन्द्रीय कार्य समितिमध्ये महाधिवेशनले १३४ जनालाई निर्वाचित गर्ने छ । बाँकी ३३ जना मनोनीत हुने छन् ।