काठमाडौं । संघीय संसदको दशौं अधिवेशन मंगलबारदेखि शुरु हुने भएको छ ।

संघीय संसदको अधिवेशन मंगलबार दिउँसो २ बजेका लागि बोलाइएको छ । संसद बैठक शुरु हुनुअघि संसद सचिवालयले सोमवार सांसदहरुको कोरोना परीक्षण गराएको थियो ।

यता, संसद बैठक बोलाइएपछि अमेरिकी सहयोग परियोजना एमसीसी विरोधी दलहरुले आन्दोलन जारी राखेका छन् ।

नेकपा (क्रान्तिकारी माओवादी) र नेत्र विक्रमचन्द नेतृत्वको नेकपा सहितका विभिन्न राजनीतिक दलहरुले मंगलबार काठमाडौंको बानेश्वरस्थित संघीय संसदको कार्यालय घेराउ गर्ने जनाएका छन् ।

संघीय संसदको दशौं अधिवेशन डाकेर एमसीसी परियोजना टेबल गर्ने योजना रहेको भन्दै ती दलहरु चरणवद्ध आन्दोलन गर्दै आएका छन् ।
उनीहरुले सोमवार एमसीसीको नेपालस्थित कार्यालय (एमसीए) को कार्यालय घेराउ गरेका थिए ।

सोमबार एमसीए, नेपालको कार्यालय घेराउ कार्यक्रममा क्रान्तिकारी माओवादीका सीपी गजुरेल, विप्लव नेकपाका धर्मेन्द्र बास्तोला लगायतका नेताहरु सहभागी थिए । नेपालका लागि एमसीसी परियोजना अमेरिकी सैन्य रणनीति अन्तरगतकै परियाजना भएको उनीहरुको दाबी छ ।