काठमाडौँ । नेकपा माओवादी केन्द्र वागमती प्रदेश कमिटीका लागि हुनलागेको निर्वाचनमा उम्मेदवारी दर्ता भएको छ । माओावदी केन्द्रको निर्वाचन समितिले तोकिएको समयभन्दा केही ढिलो गरी उम्मेदवारी दर्ता भएको हो ।

निर्वाचन समितिका अनुसार अध्यक्षका लागि दुई जनाले उम्मेदवारी दर्ता गराएका छन् । समितिका अनुसार अध्यक्षमा दिनानाथ गौतम र सरल सहयात्री पौडेलले उम्मेदवारी दर्ता गराएका छन् ।

यस्तै समितिले सार्वजनिक गरेको प्रारम्भिक सूचीअनुसार तीन उपाध्यक्षका लागि १० जनाले उम्मेदवारी दर्ता गराएका छन् । उपाध्यक्षमा दिपेन्द्र श्रेष्ठ, रुपा महर्जन, रामप्रसाद टुंगाना, मैनकुमार मोक्तान, शिव कोइराला ज्वाला, श्रीगोविन्द महर्जन, प्रेमबहादुर पुलामी छिन्तु, रामध्वज डल्लाकोटी, दिलबहादुर विक विनोद र अमरबहादुर विश्वकर्माले उम्मेदवारी दर्ता गराएका छन् ।

यस्तै एक सचिवका लागि चार जनाले उम्मेदवारी दिएका छन् । सचिवमा धर्म महर्जन, रामचन्द्र अधिकारी आरसी, इन्द्रबहादुर थिङ छिन्ताङ र अन्जानकुमार तिमिल्सिनाले प्रतिस्पर्धा गर्ने भएका छन् ।

यस्तै तीन सहसचिवका लागि १० जना र कोषाध्यक्ष एक पदका लागि तीन जनाको दावी परेको छ । माओवादी केन्द्र वागमती प्रदेशका लागि आज निर्वाचन हुने बताइएको छ । यसअघि सर्वसम्म नेतृत्व चयन गर्दै आएको माओवादीले पहिलो पटक निर्वाचन गराएको हो ।