काठमाडौं । नेपाली कांग्रेसको १४ औँ महाधिवेशनको मत परिमाण नतिजा बिहिबार राति आइसकेको छ । तर उक्त मतपरिमाण हेर्दा सुदूरपश्चिम प्रदेशबाट सभापतिसहित १७ जना केन्द्रीय समितिमा निविार्चित भएका देखिन्छन् । सुदुरपश्चिम प्रदेशका एउटै केन्द्रीय कार्यसमितिमा यतिधेरै सदस्य पाएको यो पहिलो पटक हो ।

सुदूरपश्चिमबाट सभापति, एक सहमहामन्त्री र खुला केन्द्रीय सदस्यमा चार जना निर्वाचित भएका छन् । खुला महिला केन्द्रीय सदस्यमा दुई जना, थारु महिला र खुल्लामा एक एक जना, पिछडिएको क्षेत्रबाट एक जना, प्रदेश भूगोलबाट तीन जना, दलितबाट दुई र खस आर्यबाट एक जना निर्वाचित भएका हुन् ।

सुदुरपश्चिम प्रदेशको डडेलधुराका सभापति शेरबहादुर देउवा, सहमहामन्त्री बद्रीप्रसाद पाण्डे (बाजुरा) पिछडिएको क्षेत्रबाट निर्वाचित भएका हुन् । उनी १३ औं महाधिवेशनमा केन्द्रीय सदस्य रहेका थिए । खुला केन्द्रीय सदस्यमा एनपी साउद (कञ्चनपुर), रमेश लेखक (कञ्चनपुर) नैनसिंह महर (डडेल्धुरा) र दिलेन्द्रप्रसाद बडू (दार्चुला) विजयी भएका छन् । चारमा तीन यसअघि नै केन्द्रीय सदस्य थिए ।

खुला महिला केन्द्रीय सदस्यमा कैलालीकी डा.आरजू राणा ‘देउवा’ र ईश्वरी न्यौपाने निर्वाचित भएका छन् । प्रधानमन्त्री एवम् सभापति देउवा पत्नी आरजू पहिलो पटक केन्द्रीय सदस्य बनेकी हुन् । भने यसअघिको १३ औं महाधिवेशनमा न्यौपाने केन्द्रीय सदस्य रहेकी थिइन ।
थारु खुला केन्द्रीय सदस्यमा कैलालीकै रामजनम चौधरी र महिला थारुतर्फ कैलालीका जीवन राना निर्वाचित भए ।

पिछडिएको क्षेत्रबाट अर्जुनजंगबहादुर सिंह (बझाङ) केन्द्रीय सदस्यमा विजयी भए । सांसद, राज्यमन्त्री तथा राजदूत समेत भइसकेका सिंह कांग्रेसको केन्द्रीय सदस्य पहिलो पटक बनेका हुन् ।

केन्द्रीय सदस्य दलित खुलामा नृपबहादुर वड र प्रकाश स्नेही रसायली (वझाङ) निर्वाचित भएका छन् । वड धनगढी उप–महानगरपालिकाका नगर प्रमुख हुन् भने रसायली प्रतिनिधिसभा सदस्य हुन् ।

खस आर्यबाट पूर्वसञ्चार राज्यमन्त्री गोविन्दबहादुर शाह निर्वाचित भएका छन् ।

त्यसैगरी, प्रदेश केन्द्रीय सदस्यमा महिलातर्फ कैलालीका सुशीला मिश्र ‘भट्ट’ र कैलालीकै डा.रणबहादुर रावल तथा कञ्चनपुरका यज्ञराज जोशी निर्वाचित भएका हुन् ।

रावल सुदूरपश्चिम प्रदेश सभामा नेपाली कांग्रेस संसदीय दलका नेता हुन्। सुशीला मिश्र ‘भट्ट’ धनगढी उपमहानगरपालिकाकी उपप्रमुख समेत हुन् भने जोशी महेन्द्रनगरका पूर्व नगर प्रमुख हुन् ।