काठमाडौं । नेकपा (माओवादी केन्द्र)को आठौँ राष्ट्रिय महाधिवेशनमा अध्यक्ष पुष्पकमल दाहाल प्रचण्डले राजनीतिक दस्तावेज प्रस्तुत गरेका छन् ।
माओवादी केन्द्रको आठौँ राष्ट्रिय महाधिवेशनको बन्दसत्र सोमवारदेखि सुरु भएको छ । बन्दसत्रमा अध्यक्ष प्रचण्डले राजनीतिक तथा वैचारिक दस्तावेज प्रस्तुत गरेका छन् ।
त्यसैगरी, नेता देव गुरुङले पार्टीको विधान मस्यौदा प्रस्तुत गरेका छन् । प्रचण्डले पेश गरेको दस्तावेजमाथि छलफल गर्नका लागि २५ वटा समुह विभाजन गरिएको छ । मंगलवारदेखि समुहगत छलफल सुरु हुने भएको छ ।
अध्यक्ष दाहालले प्रस्तुत गरेको दस्तावेजमा नेपाली मौलिकता र विशेषतासहितको नेपाली पुँजिवादी क्रान्ति सम्पन्न भएको र नेपाली मौलिकता र विशेषताको समाजवाद प्राप्तीका लागि अघि बढ्ने कुरा उल्लेख भएको माओवादी केन्द्रका नेता शक्ति बस्नेतले बताए ।
समाजवाद प्राप्तिको बाटो र प्रक्रिया पनि आफ्नै प्रकारको हुने मुल विषयवस्तु दस्तावेजमा रहेको उनले बताए ।

‘नेपाली मौलिकता र विशेषतासहित नेपाली पुँजिवादी जनवादी क्रान्ति सम्पन्न भयो । संघीय लोकतान्त्रिक गणतन्त्र नेपाली मौलिकता र विशेषतामा आधारित हो र आगामी हामीले जो समाजवादको कुरा गरिरहेका छौँ, समाजवाद पनि नेपाली मौलिकता र विशेषताको हुनेछ । समाजवाद प्राप्तिको बाटो र प्रक्रिया पनि हाम्रो आफ्नो हुनेछ भन्ने कुरा यसको मुल थिम रहेको छ ।’– बस्नेतले भने ।
आइतवारदेखि सुरु भएको माओवादी केन्द्रको आठौँ राष्ट्रिय महाधिवेशन पाँच दिनसम्म चल्ने भएको छ ।