काठमाडौँ । नेकपा (माओवादी केन्द्र) ले राष्ट्रिय सभा सदस्यका लागि उम्मेदवारको नाम टुंगो लगाएको छ । अध्यक्ष पुष्पकमल दाहाल प्रचण्डले सोमबार साँझ पार्टीको भागमा परेको ५ सिटमा उम्मेदवार तय गरेका हुन् ।

माओवादी केन्द्रबाट प्रदेश २ महिलामा उर्मिला अर्याल, गण्डकी अन्यमा सुरेश आलेमगर, दलिततर्फ गोरखाका भरत सुनार, अपाङ्मा सुर्खेतका नरबहादुर विष्ट र सुदूरपश्चिम प्रदेश दलित कोटामा जगत पार्की राष्ट्रियसभा सदस्यको उम्मेदवार बन्ने भएका छन् ।

महाधिवेशनपछि नवनिर्वाचित केन्द्रीय समितिको सोमबार दिउँसो बसेको बैठकले अध्यक्ष प्रचण्डलाई नै राष्ट्रिय सभा सदस्यको उम्मेदवार छनोटका लागि अधिकार दिएको थियो ।

आगामी माघ १२ गते हुने उक्त निर्वाचनका लागि मंगलबार बिहान १० देखि दिउँसो ३ बजेसम्म उम्मेदवारको मनोनयन दर्ताको समय तय गरिएको निर्वाचन आयोगले जनाएको छ ।

निर्वाचनमा १२ राजनीतिक दलले भाग लिँदैछन् । आज उम्मेदवार मनोनयन दर्ता गरेका उम्मेदवारहरुलाई आयोगले पुस २५ गते निर्वाचन चिन्ह प्रदान गर्नेछ ।

आगामी फागुन २० गते नेकपा (एमाले)का आठ, नेकपा (एकीकृत समाजवादी)का चार, नेकपा (माओवादी केन्द्र)का चार र नेपाली कांग्रेसका तीन राष्ट्रियसभा सदस्यको पदावधि सकिँदैछ ।

राष्ट्रियसभाको निर्वाचनमा प्रदेशसभा सदस्य र स्थानीय तहका प्रमुख तथा उपप्रमुख मतदाता हुन्छन् ।