काठमाडौँ । नेपाली कांग्रेसका नेता शेखर कोइरालाले आफ्नो गुटलाई बलियो बनाउँदै लगेका छन् । कांग्रेस सभापति पदमा देउवासँग प्रतिष्पर्धा गरेका कोइरालाले पराजय ब्यहोरेसँगै आफ्नो समूहलाई भेटघाट र छलफल तीब्र पारेका छन् ।

कांग्रेस बरिष्ठ नेता रामचन्द्र पौडेल सक्रिय राजनीतिबाट पछाडी हटेसँगै कोइरालाले आफ्नो गुटलाई मजबुत बनाउन खोजिरहेका छन् । पार्टीको १४ औं महाधिवेशनमा पौडेलले आफू तटस्थ बस्ने बताए पनि भित्री रुपमा देउवालाई सहयोग गरेपछि कोइरालासमूह पौडेलसँग पनि रुष्ट छ ।

कोइरालाले महाधिवेशनबाट पार्टी पार्टी नेतृत्वको परिणाम घोषणा भए लगत्तै आफू अब हरेक कार्यकर्ताको घर आँगनमा पुग्ने प्रतिवद्धता आफ्नो समूहमा गरेका थिए ।

महाधिवेशन लगत्तै देउवा एक पक्षीय रुपमा अघि बढेको कोइराला पक्षले टिप्पणी गर्दै आएका छन् । कोइरालाले बुधबार आफ्नो पक्षधर नेताहरुलाई काठमाडौंको सिंहदरबार अगाडिकै बसेरा होटलमा बोलाएका छन् ।

कोइरालाले दिउँसो २ बजेका लागि बोलाएको बैठकमा आफ्नो समूहको आगामी रणनीति तय गर्ने बताइएको छ ।
आफ्नो पक्षको बैठकको तयारीका लागि भन्दै कोइराला समूहका नेताहरु मंगलबार पनि छलफलमा थिए ।

आजको आफ्नो समूहको बैठकमा आफ्नो समूहबाट निर्वाचन लडेका पदाधिकारी तथा सदस्यहरुलाई बोलाइएको कोइरालाको निजी सचिवालयले जनाएको छ ।

कोइरालाको सचिवालयकाअनुसार, महाधिवेशनको विस्तृत रूपमा समीक्षा गर्न कोइरालाले आफ्नो प्यानलबाट पदाधिकारी तथा केन्द्रीय सदस्यमा चुनाव लडेका लगायतका नेताहरूलाई बोलाइएको छ ।

पौडेल पक्षका भनी चिनिएका कोइरालासहित संस्थापन इतर पक्षबाट महाधिवेशनमा प्रकाशमान सिंह पनि सभापतिमा लडेका थिए । दोस्रो चरणमा सभापतिमा दुई जनाबीचको प्रतिष्पर्धामा सिंहले देउवालाई समर्थन गरेका थिए । देउवा पक्षकै नेता विमलेन्द्र निधि र आफ्नै समूहका सिंहले देउवालाई साथ दिए पनि आफूले ४० प्रतिशत मत ल्याएको भन्दै आफूलाई शक्तिका रुपमा स्वीकार गर्नुपर्ने पक्षमा छन् ।

४० प्रतिशत मत ल्याएको आफ्नो समूहलाई पार्टी सभापति देउवाले शक्तिका रुपमा स्वीकार गर्न नखोजेको संकेत कोइरालाले पाएपछि आफ्नो समूहमा छलफल बढाउन थालेका हुन् ।