काठमाडौं । नेकपा (क्रान्तिकारी माओवादी)का महासचिव मोहन वैद्यले संसवादी दलहरुले समाजवाद भन्ने पूँजीवाद लागू गर्ने गरेको बताएका छन् ।

अनेरास्ववियू (क्रान्तिकारी)ले आजदेखि सुरु गरेको पत्रकारिता तथा उदघोषण तालिमको उदघाटन गर्दै वैद्यले सबै दलहरुले दलाल पूँजीपतिहरुलाई पोस्ने काम गरेको आरोप लगाए ।

संसदीय ब्यवस्था भनेकै दलाल पूँजीपतिहरुको ब्यवस्था भएकाले यसका विरुद्ध पत्रकारहरुले सशक्त कलम चलाउनुपर्नेमा जोड दिए ।

वैद्यले कार्लमार्क्स पनि पत्रकार भएको उल्लेख गर्दै पत्रकारिता एउटा सशक्त आन्दोलन भएको उल्लेख गरे । आजको युग सूचना साम्राज्यको युग तथा सूचना क्रान्तिका युग भन्दै उनले पत्रकारिता महत्वपूर्ण भएको उल्लेख गरे ।