सुर्खेत । कर्णाली प्रदेशका भूमि व्यवस्था, कृषि तथा सहकारीमन्त्री चन्द्रबहादुर शाही चार जनाको ११ लाख ऋणमा छन् । उनले सार्वजनिक गरेको आफ्नो सम्पत्ति विवरणमा त्यस्तो खुलाईएको छ ।

आफुसँग बैंकमा पारिश्रमिक वापतको ३ लाख मौज्जाद रहेको तर ऋण भने चार जनासँगको ११ लाख रहेको मन्त्री शाहीले सार्वजनिक गरेका छन् ।

मन्त्री शाहीले अर्कैको नाममा घरजग्गा रहेको पनि उल्लेख गरेका छन् ।

शाहीसँग मुगुको सोरु गाउँपालिका-१ मा बुबा मानबहादुर शाहीको नाममा एक रोपनी पुर्ख्यौली र भक्तपुर चाँगुनारायणमा २ ठाउँमा १० आना जग्गा उनकी श्रीमती जालगेडी शाही र सुरेशबहादुर शाहीको नाममा रहेको पनि सार्वजनिक गरेका छन् ।

मन्त्री शाहीले उक्त सम्पत्ति पूरै ऋण गरेर खरिद गरेको उल्लेख गरेका छन् । पुर्ख्यौली जग्गा बुबाकै नाममा मुगुको सोरु गाउँपालिका-१ मा २० रोपनी खेत रहेको छ ।

उनको पुर्ख्यौली पाँच तोला सुन श्रीमतीको नाक, कानका गहना, १ तोला चाँदी रहेको पनि उनले सार्वजनिक गरेको सम्पत्ति विवरणमा उल्लेख छ ।