काठमाडौं । राष्ट्रिय प्रजातन्त्र पार्टीले बुधबारको राष्ट्रियसभा निर्वाचनमा प्रदेश १ मा मात्रै भाग लिने निर्णय गरे पनि गण्डकीमा राप्रपा प्रतिनिधिले मतदानमा भाग लिएकी छन् ।

म्याग्दीको बेनी नगरपालिकाकी उपप्रमुख सञ्जु बरूवालले राष्ट्रियसभा सदस्य निर्वाचनमा मतदान गरेकी हुन् ।

मंगलबार बसेको राप्रपा पदाधिकारी बैठकले प्रदेश १ बाहेक अन्य प्रदेशमा मतदान नगर्न आफ्ना जनप्रतिनिधिलाई निर्देशन दिएको थियो ।

राप्रपा नेतृ तथा म्याग्दी बेनी नगरपालिककी उपमेयर बरुवालले बुधबार पोखरास्थित मतदान केन्द्रमा पुगेर मतदान गरेकी हुन् । उनले आफूलाई भोट नहाल्न पार्टीबाट कुनै निर्देशन नआएको बताएकी छन् ।

गण्डकी प्रदेशकै राप्रपाका अन्य मतदाताले भने निर्वाचन बहिष्कार गरेका छन् ।

म्याग्दीको लो–घेकर दामोदरकुण्ड गाउँपालिका अध्यक्ष लोप्साङ छोम्पेल विष्ट र बागलुङ नगरपालिकाका उपमेयर सुरेन्द्र खड्का पनि राप्रपाबाट निर्वाचित हुन् । उनीहरु भने निर्वाचनमा अनुपस्थित रहेका थिए ।