काठमाडौं । देशभरका २५२ पत्रकार अहिले पनि कोरोना संक्रमणमा छन् । नेपाल पत्रकार महासंघका महासचिव रोशन पुरीका अनुसार ६ सय ५० पत्रकार अहिलेसम्म कोरोना भाइरसवाट प्रभाबित बनेपनि त्यसमध्ये २५२ जना पत्रकार अहिलेपनि सक्रिय संक्रमितका रुपमा रहेका छन् ।

पुरीले विहिवार जारी गरेको विज्ञेप्तीका अनुसार, जसमा प्रदेश नम्बर १ मा १८, प्रदेश २ मा ९, बागमती प्रदेश १४, गण्डकी ७, लुम्बिनी २७, कर्णाली ३०, सुदूरपश्चिम ३०, उपत्यका, प्रतिष्ठान र एसोसिएट प्रदेशमा ११७ रहेका छन् । संक्रमतिमध्ये ३२ जनाको अस्पतालमा उपचार भइरहेको तथा ४ जना आइसियुमा उपचाररत छन् ।

हालसम्म ७ जना पत्रकारले कोभिडका कारण ज्यान गुमाउनु परेको पनि महासचिव पुरीले वक्तब्यमार्फत उल्लेख गरेका छन् ।

अग्रभागमा रहेर पेशागत जिम्मेवारी बहन गर्ने क्रममा पत्रकारहरु संक्रमित हुने दर वृद्धि भएसँगै महासंघले केन्द्रीय कार्यालयमा सञ्चालन गर्ने १० बेडमध्ये ५ बेडको अक्सिजनसहितको आइसोलेसन सेन्टरको निर्माण कार्य अन्तिम चरणमा पुगेको पनि पुरीले बताएका छन् । थप ५ बेडको निर्माण प्रक्रिया अगाडि बढेको उनले बताए ।

अहिलेसम्म रोल्पा, दाङ, कपिलवस्तु, अर्घाखाँची, गुल्मी, पर्वत र बाग्लुङमा अक्सिजनसहितको आइसोलेसन सेन्टर स्थापना गरिएको पनि महासंघले जनाएको छ ।

महासंघले पत्रकारको स्वास्थ्य सुरक्षा तथा पेशागत सुरक्षामा आपतकालीन टोली नै बनाएर काम गर्न र आइसोलेसन सेन्टरको व्यवस्थाका लागि सक्रिय सहभागिता जनाउन सबै प्रदेश समिति र शाखाहरुलाई अनुरोध समेत गरेको छ ।