काठमाडौँ । रुपन्देहीको छिपागढमा रहेको शंकर ग्यास उद्योगले भारतबाट लिक्विड ग्यास नेपाल भित्र्याएको छ । जिल्लामा बढ्दो अक्सिजन ग्यासको मागलाई कम गर्न नसकेपछि भारतबाट लिक्विड ग्यास आयात गरेको हो ।

शुक्रबार आयात गरिएको ग्यास करिब पाँच सय सिलिण्डर रहेको छ । बिहान भैरहवा भन्सार कार्यालयमा आवश्यक कागजात प्रक्रिया पूरा गरी अक्सिजन उद्योसम्म पुर्‍याएको भन्सार कार्यालयमा जिल्ला प्रहरी कार्यालय रुपन्देहीका प्रहरी निरीक्षक तेजबहादुर खत्रीले जानकारी दिए ।

उद्योगले दैनिक पाँच सय सिलिण्डर अक्सिजन उत्पादन गर्दै आएको थियो । जिल्लामा दैनिक दुई हजार एक सय ५० भन्दा बढी सिलिण्डर अक्सिजन माग भए पनि ११ सय सिलिण्डर मात्रै उत्पादन हुँदै आएको छ । जिल्लामा गत सातादेखि अक्सिजन अभाव हुँदै आएको छ ।

केही दिनअगि अक्सिजन अभाव भएपछि विभिन्न तहसँगको समन्वयमा नेपाली सेनाको हेलिकोप्टरमार्फत ४० सिलिण्डर ग्यास चितवन र सिमराबाट रुपन्देहीमा लगिएको थियो ।