काठमाडौं । नेपालमा कोरोना संक्रमणबाट पहिलो मृत्युको ठिक एक वर्ष पुगेकै दिन २१४ जनाले ज्यान गुमाएका छन् । पहिलो मृत्युको ठिक एक वर्ष पुगेकै दिन जेठ ३ गते स्वास्थ्य तथा जनसंख्या मन्त्रालयको तथ्यांक अनुसार नेपालमा नोभेल कोरोना भाइरस (कोभिड–१९) बाट मृत्यु भएकाको संख्या ५ हजार २१७ पुगेको छ ।

नेपालमा पहिलो पटक २०७७ साल जेठ ३ गते कोरोना संक्रमणबाट सिन्धुपाल्चोककी २९ वर्षिया सुत्केरी महिलाले ज्यान गुमाएको मन्त्रालयले पुष्टि गरेको थियो ।

नेपालमा पहिलो कोरोना संक्रमित भेटिएको करिब चार महिनापछि कोरोनाभाइरसकै कारण ज्यान गुमाउने उक्त पहिलो घटना थियो ।

जेठ ४ गते बाँकेको नरैनापुरका २५ वर्षका पुरुषले कोरोना संक्रमणबाट ज्यान गुमाएका थिए । त्यस्तै जेठ ८ गते गुल्मीका ४१ वर्षका पुरुष, जेठ ४ गते बाराका ७० वर्षका पुरुषको मृत्यु भएको थियो तर उनको कोरोना पुष्टिको सार्वजनिक जेठ १२ गते मात्र भयो ।

गत जेठमा मात्र १५ जनाले कोरोनाबाट ज्यान गुमाएका मन्त्रालयको तथ्याकंमा देखिन्छ । गतवर्ष जेठ ३ गतेदेखि शुरु भएको कोरोनाबाट हुने मृत्युको शृंखला पछिल्लो समय झन् डरलाग्दो रुपमा बढ्न थालेको छ ।

आजसम्म नेपालमा कोरोना पुष्टि भएकाको संख्या चार लाख ६४ हजार २१८ पुगेको छ । कुल संक्रमितमध्ये ज्यान गुमाउने १.१२ प्रतिशत रहेको मन्त्रालयको तथ्यांकले देखाउँछ ।

नेपालमा कोरोनाका कारण ज्यान गुमाउनेमध्ये सबैभन्दा बढी काठमाडौं उपत्यकाका छन् । काठमाडौंमा १ हजार १८९, भक्तपुर २३५ र ललितपुर ३१८ गरी उपत्यकामा १ हजार ७४२ जनाले ज्यान गुमाएका छन् ।

कुन प्रदेशमा कतिले ज्यान गुमाए ?
मन्त्रालयको तथ्यांक अनुसार कोरोना संक्रमणबाट प्रदेश १ मा ६४१, प्रदेश २ मा ४४८, वाग्मती प्रदेशमा २ हजार २८३, गण्डकीमा ५०२ जनाले ज्यान गुमाएका छन् ।

यसैगरी लुम्बिनीमा ९६६, कर्णालीमा १२७ र सुदूरपश्चिममा २४८ जनाले कोरोनाका कारण ज्यान गुमाएका मन्त्रालयका सहप्रवक्ता डा समिर अधिकारीले बताए ।

नेपालमा कोरोना संक्रमणबाट विदेशी नागरिकले पनि ज्यान गुमाएका छन् । मृत्यु भएकामध्ये आठ भारतीय नागरिक पनि छन् । जिल्लागत तथ्यांक हेर्दा २०० जनाभन्दा बढी मृत्यु भएका पाँच जिल्ला छन् ।

विश्वभर हालसम्म ३३ लाख ९३ हजार ६४८ जनाले काेराेनाका कारण ज्यान गुमाएका छन् ।

संक्रमणको दर बढेसँगै मृत्युदर पनि बढ्ने जनस्वास्थ्य विज्ञहरु बताउँछन् । सरुवा रोग विशेषज्ञ डा शेरबहादुर पुन अझै दुई साता सचेत बन्नुपर्ने बताउँछन् ।

उनका अनुसार एक साताअघि कोरोना संक्रमणको दर कुल परीक्षणको ५० प्रतिशत थियो । तर पछिल्लो साता कुल परीक्षणको ४० देखि ४५ प्रतिशतमा संक्रमण देखिएको छ । उनी भन्छन्, ‘कोरोना संक्रमण अहिले घर भित्रभित्र पुगेको छ ।’