काठमाडौँ । जनता समाजवादी पार्टी (जसपा) का अध्यक्ष उपेन्द्र यादव समूहले पार्टी विधान उलंघन गर्ने नेताहरूलाई कारबाही गर्ने भएको छ । शनिबार राति अबेरसम्म बसेको कार्यकारिणी समिति बैठकले अर्का अध्यक्ष महन्थ ठाकुर र वरिष्ठ नेता राजेन्द्र महतो ,सर्बेन्द्रनाथ सुक्ला र लक्षमणलाल कर्ण लाई स्पष्टीकरण सोध्ने निर्णय गरेको हो ।

उपेन्द्र यादवको अध्यक्षमा बहुमत केन्द्रीय कार्यकारिणी समिति सदस्यहरू उपस्थित बैठकले विधि विधानविपरीत चल्ने ठाकुर समूहलाई कारबाही गर्ने निर्णय गरेको छ । संसदीय दलको विधान नभएको र पार्टीले निर्वाचन समितिसमेत नबाएको अवस्थामा अवैध तवरले गरिएको दलको नेता चयन अस्वीकार गर्ने निर्णय बैठकले गरेको अध्यक्ष यादवले जानकारी दिए । जसपाभित्र वर्तमान सरकारलाई समर्थन गर्ने या विपक्षी गठबन्धनलाई सहयोग गर्ने भन्‍नेमा विवाद भएपछि ठाकुर समूहले बहुमत सांसदहरूको भेला गराएर नेता महतोलाई गत बैशाख ३० गते संसदीय दलको नेता बनाएको थियो । तर यादव समूहले भने त्यसको विरोध गर्दै आएको थियो ।राजेन्द्र महतोलाई संसदीय दलको नेता नमान्‍ने निर्णय पनि बैठकले गरेको अध्यक्ष यादवले जानकारी दिए ।

यसैगरी, बैठकले असंवैधानिक तवरले संसद् विघटन गरिएको भन्दै यसको बिरोध गरेको छ । त्यस्तै संसद् विघटनको विरुद्धमा विपक्षी ५ दलले गरेको निर्णयको स्वागत गर्ने निर्णय पनि बैठले गरेको अध्यक्ष यादवले जानकारी दिए । यादवले भने,“सरकारको कदमविरुद्ध परिवर्तनकारी शक्तिसँगको सहकार्यलाई अघि बढिनेछ ।”

जसपामा कार्यकारिणी समितिमा यादव समूहको बहुमत छ । भने दलमा ठाकुर समूहको बहुमत छ । रामसहायप्रसाद यादवका अनुसार शनिबारको बैठकमा भौतिक रूपमा २८ र भाइबरसमेतबाट जोडिएका ४ जना गरी कुल ३२ जनाको बैठक बसेको थियो । जसपामा ५१ जनाको कार्य कार्यकारिणी समिति छ ।