काठमाडौँ । विभिन्न पाँच महिला संघले प्रधानमन्त्री केपी शर्मा ओलीको सिफारिसमा राष्ट्रिपति विद्यादेवी भण्डारीले गरेको प्रतिनिधि सभाको विघटनको विरोध गरेका छन् ।

नेपाल महिला संघ, अखिल नेपाल महिला संघ क्रान्तिकारी, समाजवादी महिला संघ, अखिल नेपाल महिला संघ एमाले नेपाल समूह र जनमोर्चाको अखिल नेपाल महिला संघले संयुक्त विज्ञप्ति निकाल्दै सरकारले गरेको प्रतिनिधि सभा विघटनको विरोध जनाएका हुन् । संयुक्त महिला संघले २०७८ जेठ ७ को मध्यरातमा प्रतिनिधि सभाको विघटन गरेर असंवैधानिक र अलोकतान्त्रीक कदमको विरोध गरेको जनाएको छ ।

संयुक्त महिला संघको संयुक्त विज्ञप्तिमा भनिएको छ, ‘कोभिड-१९ ले दैनिक २ सयका दरले नागरिकको मृत्यु भइरहेको, नागरिकले खोप पाइरहेका छैनन्, अक्सिजन र अस्पतालमा बेड पाइरहेका छैनन्, यसको लागि सरकारबाट कुनै पहल भएको छैन ।’ सरकारले यो समयमा चुनाव गरेर आफ्नो कुची बचाउनु भन्दा पनि सबै मैलेर महामारीलाई परास्त गर्नुपर्ने संयुक्त विज्ञप्तिमा उल्लेख गरिएको छ । सरकारले चुनावको बेमौसमी बाजा बजाएर जनतालाई आहत पार्दै सत्ता लभाउन लागि परेको संयुक्त महिला संघले बताएका छन् ।