काठमाडौँ । नेपाली कांग्रेसका सभापति शेरबहादुर देउवाले जनआन्दोलन २०६२–६३ को सफलता पश्चात कांग्रेसको नेतृत्वमा नेपाल संघीय लोकतान्त्रिक गणतन्त्रात्मक मुलुकमा स्थापित भएको बताएका छन् । गणतन्त्र दिवसको अवसरमा शुभकामना व्यक्त गर्दै देउवाले यस्तो बताएका हुन् ।

सभापति देउवाले नेपालको संविधानको संरक्षण र संघीय लोकतान्त्रिक गणतन्त्रात्मक शासन व्यवस्थाको संस्थागत विकास गरेर मुलुकलाई आर्थिक समृद्धिको मार्गमा अग्रसर गराउँदै लोकतान्त्रिक संस्कार, संस्कृति, मूल्य र मान्यतामा आधारित समतामूलक समाजको निर्माण गर्न गणतन्त्र दिवसले सबैलाई प्रेरणा प्रदान गर्नेमा विश्वास व्यक्त गरेका छन् ।

उनले राज्य प्रणालीको सफलता त्यसको नेतृत्व गर्ने शासकको चरित्र र व्यवहारमा निर्भर हुने बताए । उनले भने, “लोकतान्त्रिक गणतन्त्रको सफलताका लागि हाम्रो शैली र व्यवहार निरन्तर समीक्षाको विषय बन्द छ र बन्नु पर्दछ । देशको राष्ट्रपति र प्रधानमन्त्रीकै संस्कार र व्यवहार तदनुकूलको बन्न नसक्दा त्यसको परिणाम देशले भोग्नु पर्ने हुन्छ र आज हामी त्यो भोगिरहेका छौं । अतः गणतन्त्र दिवसको यो मितिमा यसप्रति गम्भीरता राख्न र यो चुनौती पार गरेर अघि बढ्ने संकल्प गर्न म समस्त नेपालीमा अपिल गर्दछु ।”

उनले कोरोना भाइरस (कोभिड-१९)को महामारीका कारण देश कठिन र संवेदनशील परिस्थितिको सामना गरिरहेको भन्दै जनताको जीवनप्रति सरकार सर्वथा उदासिन र संवेदनहीन देखिएको बताए । संक्रमणबाट आफू जोगिन र अरुलाई पनि जोगाउन स्वास्थ्य मापदण्डलाई पूर्ण पालना गर्दै उच्च सर्तकता र दृढ मनोबल बनाउन देउवाले सबैलाई आग्रह गरेका छन् ।