काठमाडौँ । नेकपा एमालेको सुदूरपश्चिम प्रदेश कमिटीले पार्टीको निर्देशनविपरीत सरकारमा गएको भन्दै ६ जना मन्त्रीलाई कारबाहीको सिफारिस गरेको छ । यस्तै, प्रदेशसभा संसदीय दलका सचेतकलाई पनि कारबाहीको लागि सिफारिस गरेको छ ।

२४ घण्टाभित्र स्पष्टीकरण पेश नगरेको भन्दै प्रदेश कमिटीले सुदूरपश्चिम प्रदेश सरकारका ३ जना मन्त्री र ३ राज्यमन्त्री तथा प्रदेशसभा संसदीय दलका सचेतक दुर्गाकुमारी कामीलाई कारबाही गर्न प्रदेश कमिटीले एमालेको केन्द्रीय कमिटीलाई सिफारिस गरेको छ ।

एमाले सुदूरपश्चिम प्रदेश कमिटी अध्यक्ष कर्णबहादुर थापाले भौतिक पूर्वाधार विकासमन्त्री दीर्घबहादुर सोडारी, सामाजिक विकासमन्त्री लालबहादुर खड्का, आन्तरिक मामिला तथा कानून मन्त्री पूर्णा जोशीलाई कारबाही गरेको जानकारी दिए ।

यस्तै, उनका अनुसार भौतिक पूर्वाधार विकास राज्यमन्त्री चुनकुमारी चौधरी, सामाजिक विकास राज्यमन्त्री मनाकुमारी साउद र आर्थिक मामिला राज्यमन्त्री अर्चना गहतराजलाई पार्टीको साधारण सदस्यसमेत नरहने गरी निष्काशन गर्न सिफारिस गरिएको मेरोन्यूजलाई जानकारी दिए ।

एमालेको प्रदेश कमिटीले यसअघि प्रदेश संसदीय दलका नेतासमेत रहेका आर्थिक मामिला तथा योजना मन्त्री प्रकाशबहादुर शाह, पूर्व उद्योग पर्यटन वन तथा वातावरण मन्त्री माया भट्ट र सामाजिक विकास मन्त्री कृष्णराज सुवेदीलाई साधारण सदस्य नरहने गरी पार्टीबाट निष्कासन गर्न सिफारिस गरिसकेको छ ।