काठमाडौं । फिफा विश्वकप–२०२२ तथा एसियन कप–२०२३ अन्तर्गत दोस्रो चरणको छनोट खेलमा नेपालले दोस्रो जित निकालेको छ ।

कुवेतमा बिहीबार भएको खेलमा चाईनिज ताईपेईलाई २–० गोल अन्तरले पराजित गर्दै नेपालले छनोट खेलमा दोस्रो जित निकालेको हो । कुवेत सिटीस्थित जाबेर अल अहमद अन्तराष्ट्रिय स्टेडियममा नेपाललाई जित दिलाउन अन्जन विष्ट र नवयुग श्रेष्ठले एक/एक गोल गरे ।

खेलको चौथो मिनेटमा अन्जनले पेनाल्टीमा गोल गर्दै नेपाललाई जित दिलाएका थिए । खेलको ८२ औं मिनेटमा परिवर्तित खेलाडीको रुपमा मैदान प्रवेश गरेका नवयुगले गोल गर्दै नेपाललाई २–० को अवस्थामा पुर्‍याए । यीनै दुई गोल नै नेपाललाई जीत दिलाउन पर्याप्त बन्यो ।

जितसँगै छनोटको समूह ‘बी’ मा रहेको नेपालले ६ खेलमा ६ अंक जोडेको छ । नेपाल तालिकाको चौंथो स्थानमा छ ।

अब नेपालले जेठ २५ गते मंगलबार जोर्डन र २८ गते शुक्रबार एसियाली पावर हाउस अष्ट्रेलियाको सामना गर्नेछ ।