काठमाडौं । पूर्वसांसद तथा नेकपा माओवादी केन्द्रका नेता विष्णु बहादुर तामाङ (विएल वाइबा) को कोरोना संक्रमणका कारण निधन भएको छ ।

सिरहाको कर्जन्हा नगरपालिका–५ निवासी ७८ वर्षीय तामाङको उपचारको क्रममा गएराति निधन भएको हो । कारोना सङ्क्रमणबाट मुक्त भइसकेका उनको उपचारको सिलसिलामा सुगर लेभल एक्कासी बढी भएर झापाको दमकस्थित आम्दा अस्पतालमा मृत्यु भएको परिवारले जनाएको छ ।

उनको शव घर ल्याएर धार्मिक परम्परा अनुसार भोली बिहानमात्रै दाहसंस्कार गर्ने कार्यक्रम बनिरहेको वडाध्यक्ष भुषण खातीले जानकारी दिए ।

यसैबीच पूर्व सांसद तामाङको निधनप्रति माओवादी केन्द्रका अध्यक्ष पुष्पकमल दाहाल प्रचण्डले दुःख व्यक्त गरेका छन् ।
वाइबाको निधनले नेपाली राजनीतिले सच्चा राष्ट्रवादी अग्रगामी नेता गुमाएको प्रचण्डले बताए ।

‘कम्युनिष्ट आन्दोलनले आफ्नो अभिभावक गुमाएको छ । सादा जीवन, सरल र जुझारु कमरेड वाइबा किसान र मजदूरबीच लोकप्रिय हुनुहुन्थ्यो’, प्रचण्डले भनेका छन् ।

वाइबाका जीवनपयोगी भोगाइ परिवर्तनकारी एवं क्रान्तिकारी युवाहरुका लागि प्रेरणाको स्रोत बन्ने विश्वास लिंदै उनीप्रति प्रचण्डले श्रद्धा सुमन प्रकट गरेका छन् ।

स्थानीय सामन्तविरुद्धको तमसुक फट्टा आन्दोलनबाट आफ्नो संघर्ष यात्रा शुरु गरेका तामाङ २०४४ सालमा भारतको दरभंगामा भएको राष्ट्रिय सम्मेलनबाट तत्कालीन नेपाल कम्युनिष्ट पार्टी (चौ.म.)को केन्द्रीय सदस्य भएका थिए ।

२०४८ सालको आम निर्वाचनमा सिराहाको तत्कालीन निर्वाचन क्षेत्र नं ५ बाट उनी प्रतिनिधि सभा सदस्यमा निर्वाचित भएका थिए ।

वाइबा २०७० सालमा नेकपा तदर्थ र एकीकृत नेकपा माओवादीबीचको एकीकरणपछि केन्द्रीय सदस्य हुँदै माओवादी केन्द्रको पोलिटब्यूरो सदस्य रहेका थिए । उनका तीन छोरा र दुई छोरी छन् ।