काठमाडौँ । नेकपा माओवादी केन्द्रले प्रदेश १ सरकारको दिएको समर्थन फिर्ता लिएको छ । आइतबार प्रदेश १ सभाको संसदीय दलका नेता इन्द्रबहादुर आङ्बोले सरकारको समर्थन फिर्ता लिएको पत्र दर्ता गराएको प्रदेशसभा सचिवालयले जनाएको छ ।

पत्रमा मुख्यमन्त्री शेरधन राई संसद् र संसदीय मूल्य मान्यताप्रति अनुत्तरदायी भएको, सरकार सञ्चालनमा असफल भएको, कोरोना नियन्त्रण (कोभिड–१९) नियन्त्रण, रोकथाम र उपचारका साथै सुशासन कायम गर्न नसकेकाले समर्थन दिइरहन अनुपयुक्त भएको जनाएको छ । यी कारणले प्रदेश १ सरकारलाई दिएको समर्थन फिर्ता लिएको उल्लेख गरिएको छ ।

माओवादी केन्द्र प्रदेश १ संसदीय दलको २०७७ चैत १६ गतेको निर्णयले सरकारको समर्थन फिर्ता लिने निर्णय भएको थियो ।