काठमाडौं । प्रहरी चौकीभित्र छिरेर प्रहरीमाथी आक्रमण गर्ने ५ जना पक्राउ परेका छन् । जेठ १३ गते साँझ धरान १५ नयाँ बसपार्कस्थित अस्थायी प्रहरी चौकीमा प्रहरीमाथि आक्रमण गरेर फरार भएका मुख्य ५ जना आरोपीहरुलाई प्रहरीले पक्राउ गरेको हो ।

जिल्लाको धरान ४ का ३० वर्षीय बसन्त राई, धरान १५ का ३२ वर्षीय रेगन लिम्बु, धरान ५ का २४ वर्षीय बिक्रम राई, धरान ३ का २७ वर्षीय सिजन राई र धरान ४ का २६ वर्षीय कालु भन्ने सरोज लिम्बुलाई पक्राउ गरिएको प्रहरीले जनाएको छ ।

घटनामा १० जना युवाहरु संलग्न भएको पत्ता लगाएको छ भने प्रहरीले हालसम्म मुख्य ५ आरोपीमात्र पक्राउ गर्न सकेको छ । अन्य ५ जनाको खोजी भइरहेको जिल्ला प्रहरी कार्यालय सुनसरीले जनाएको छ ।

उनीहरुविरुद्ध मुलुकी अपराध संहिता २०७४ अन्तर्गत ज्यान मार्ने उद्योगमा मुद्दा दर्ता भइसकेको छ।

प्रहरीका अनुसार प्रहरी चौकीमा स्थानीय युवाको दुई समूहबीच खुकुरी हानाहान हुँदा चौकीका इन्चार्ज असई सुमन दाहाल घाइते भएका थिए।